UCele ezinsolweni ezishaqisayo ngokufa kukaGardee
UCele ezinsolweni ezishaqisayo kwelokubulawa kukaGardee: Oupa Mokoena/African News Agency/ANA
SEKUVELE izinsolo ezishaqisayo ezithi uNgqongqoshe wamaPhoyisa kuzwelonke, uMnuz Bheki Cele uyathinteka ekuzameni ukuhlanganisa itulo lokunida uSekela Mengameli we-EFF, uMnuz Floyd Shivambu kwelokubulawa kukaNksz Hillary Gardee.
Kuthiwa uCele uzame ukuncenga amaphoyisa aseMpumalanga ukuthi aqinisekise ukuthi uShivambu uyanindeka kuleli cala.
NgoMgqibelo uShivambu uthe uCele uzama ukusebenzisa icala likaGardee ukulwa izimpi zepolitiki.
Oyedwa wabasolwa, uPhilemon Lukhele ubhale incwadi efungelwe wayinika abaphenya ngokuziphatha kwamaphoyisa, i-Independent Police Investigative Directorate (IPID) echaza kabanzi ukuthi uhlukunyeziwe, waphoqwa ukuthi anide uShivambu kwelokubulawa kukaNksz Gardee.
UShivambu usondelene noLukhele kusuka besafunda eNyuvesi yaseWits. UShivambu waba neqhaza elikhulu ukuthi uLukhele akhethwe njengomengameli omele abafundi ngo-2003.
Encwadini efungelwe uLukhele ukubeke kwacaca ukuthi uwatshelile amaphoyisa ukuthi ngeke akwazi ukunida uShivambu ngoba sekuphele iminyaka emihlanu engaxhumani naye.
Ngesikhathi ecelwa ukuba aphawule ngezinsolo zikaLukhele, uShivambu uthe: “I-ANC isebenzisa udaba olubucayi lokubulawa nokuhlukunyezwa kwabantu besifazane ukulwa izimpi zepolitiki nokwakha ukudideka ngobuholi be-EFF. Asizona izigebengu, asikaze sibe yizona futhi asisoze saba yizona.”
Uqhube wathi abafani nezigebengu ze-ANC futhi abasoze bafana nazo.
“Sizobaveza bonke abazama ukuhlanganisa amatulo abhedayo futhi siyazi ukuthi ungqongqoshe uyabandakanyeka. Sizoluveza olokuqasha kwakhe izinkabi nayo yonke inkohlakalo abandakanyeka kuyo,” kusho uShivambu.
UCele wale waphetha ukuphendula imibuzo athunyelelwe yona. NgoMgqibelo, uNksz Lirandzu Themba uthe okhulumela ucele uthe: “UNgqongqoshe uCele ayikho into azoyiphawula kule nto.”
ULukhele ungaphakathi ngemumva kokuthi yena nabanye abathinteka kuleli cala baboshwa emva kwezinsukwana kutholakele isidumbu sikaNksz Gardee ehlathini eliseNelspruit.
Kuvela nokuthi uMnyango wezokuHlunyeleliswa kweziMilo, umshintshile ejele abegcinwe kulo kulandela ukuvela kwezindaba zokuthi utholakale neselula ngaphakathi esitokisini.
UNksz Gardee kusolwa ukuthi wabulawa ngo-Ephreli 29, okuwusuku aduka ngalo ekade eye ezitolo. Isidumbu sakhe satholwa silahliwe ehlathini eliseNelpruit ngoMey 3.