Kudutshulwe kwabulawa unogada KwaBester

UDUTSHULWE ngentululwane yezinhlamvu, wafa unogada (41) ngoLwesine ekuseni KwaBester, KwaMashu.

Kuthiwa unogada uhlaselwe esendleleni eyogibela itekisi. Kuthiwa kuqhamuke indoda ebigqoke isikhindi esiluhlaza, izimbadada, nejakhethi (navy) engenamikhono, ayangabuza lutho yakhipha isibhamu yadubula kaningi ibhekise kunogada, obefake umfaniswano womsebenzi. Le ndoda kuthiwa ayithathanga lutho.

Okhulumela inkampani yonogada, iReaction Unit South Africa (RUSA), uMnuz Prem Balram, uthe bathole umbiko ngesigameko sokudubula ngo-5.52 ekuseni, kubantu abebecela usizo lwezempilo.

Uthe abezimo eziphuthumayo baphuthume lapho bebebizelwe khona, bafica unogada eseshonile. Kuthiwa ubenamanxeba okudutshulwa ekhanda, emhlane nasezingalweni. Imbangela yokubulawa kwakhe ayikaziwa.

Okhulumela amaphoyisa eKZN, uLt Colonel Nqobile Gwala, uthe kuvulwe icala lokubulala.