Sithuthelwe ePinetown isikhungo samalayisensi
UNgqongqoshe wezokuThutha, uNkk Peggy Nkonyeni, ehlola umonakalo esikhungweni samalayisensi eRossburgh Isithombe: Sithunyelwe
SITHUTHELWE ePinetown isikhungo sokuhlolela izincwadi zokushayela saseRossburgh emuva kokukhahlanyezwa yizikhukhula.
UNgqongqoshe wezokuThutha, ukuPhepha koMphakathi nokuXhumana KwaZulu-Natal, uNkk Peggy Nkonyeni, umemezele ukuthi lesi sikhungo sizothuthelwa ePinetown ngenxa yomonakalo odalwe yizikhukhula.
NgoMsombuluko uNkk Nkonyeni uhambele kulesi sikhungo ukuyohlola umonakalo, wafica ukuthi mkhulu kakhulu. Ngokwesitatimende esithunyelwe yilo mnyango, imishini yobuchwepheshe esetshenziswa kulesi sikhungo, i-National Traffic Information System (eNaTis) imosheke yonke. Izimoto eziyisishiyagalolunye zomnyango nazo zilimele.
Lesi sikhungo singesesithathu ngobukhulu ezweni kanti sisebenza izicelo ezingu-32 000 njalo ngenyanga. Izinto ezenziwayo ezibalulekile kuso amalearner’s licence, amalayisensi okushayela, ukuvuselelwa kwamalayisensi namaPRDP.
Ngokwesitatimende, emuva kokuhlolwa, uNkk Nkonyeni uveze ukuthi lesi sikhungo sizothuthwa okwesikhashana.
“Lesi yisikhungo esikhulu esifundazweni yikho sithathe lesi sinqumo ukuze sibheke phambili ukulungiswa kwalezi zingqinamba. Izikhukhula zakamuva zisikhahlameze kakhulu ezindaweni ezibalulekile zokusebenza kanti zizovalwa. Sivumelene ngokuthi isikhungo sasePinetown sizosetshenziswa ukukhipha amalayisensi.
“Abese bekhokhile eRossburgh bazoqhubeka ePinetown ngezimpelasonto. Siyaxolisa kakhulu ngokuphazamiseka okudalekile kulabo abafake izicelo kodwa sifisa ukuqinisekisa ukuthi senza konke okusemandleni ukubuyisela isimo kwesijwayelekile.”
Uthe abeRoad Traffic Management Corporation (RTMC) bazolekelela umnyango ukuhlela uhlelo lwe-eNaTis ePinetown ngesikhathi kusahlolwa umonakalo kanti umnyango uxhumana noMnyango weMisebenzi yoMphakathi ukuze utholwe amahhovisi esikhashana ukuze ukuhanjiswa kwezidingo kungaphazamiseki. Sekungokwesithathu lapho isikhungo sikhahlanyezwa yimvula.
“Njengesisombululo sesikhathi eside, umnyango ubheka ukuthi angeke yini lawa mahhovisi asuswe kule ndawo ayiswe kwenye engenabo ubungozi bokuthi akhahlanyezwe yizikhukhula.”
UNkk Nkonyeni uthe uphiko lokukhishwa kwamalayisensi lubalulekile njengoba lusilele ngemuva ngenxa yokuhlasela kweCovid-19.