UZuma uzokhipha incwadi kule nyanga
UMNUZ Jacob Zuma okuzophuma incwadi yakhe kule nyanga.
ABALANDELI balowo owayengumengameli wezwe, uMnuz Jacob Zuma, sebeyilindele ngabomvu incwadi yakhe ezophuma ungakasongwa lo nyaka.
NgoLwesine inhlangano yakhe, iJG Zuma Foundation, imemezele ezinkundleni zokuxhumana ukuthi incwadi esihloko sithi ’The Words of a President: Jacob Zuma Speaks’ isizophuma.
Sekunesikhathi abakuleli belindele incwadi kaZuma, okungakacaci ukuthi izobe ithinta impilo yakhe, noma izinto azenzile kuhulumeni ngesikhathi ewumengameli nakwezepolitiki, noma kokubili.
“Incwadi osekunesikhathi ilindiwe izophuma ngesonto lesibili noma lesithathu kuDisemba 2021... Eminye iminingwane ngayo izodalulwa ngokuhamba kwesikhathi,” kusho inhlangano yakhe.
H.E President Zuma Speaks.
— JGZuma Foundation (Official) (@JGZ_Foundation) December 2, 2021
This long awaited book will be made available in the 2nd or 3rd week of December 2021.
Reverting stuff.
Details will be made public in due course.
Keep your eyes on this @JGZ_Foundation TL#WenzenuZuma pic.twitter.com/WaNTvYDc2C
UZuma sekunesikhathi eminyakeni edlule ethembisa ukuthi usazogeqa amagula ngezithinta ezombusazwe kuleli nokuthi kungani ’ehlaselwa’ njengoba sekuneminyaka egqigqa izinkantolo.
Izolo nje uMvikeli woMphakathi, u-Adv Busisiwe Mkhwebane uveze ukuthi oKlebe ne-Asset Forfeiture Unit (AFU) baphenya inkampani eyanikela izinkomo ezingabiza R1.5 million kuZuma, i-Agridelight.
Lokhu kulandela isikhalazo sango-2018 sikaMnuz Godrich Gardee, owayengunobhala jikelele we-EFF ngaleso sikhathi, kuMvikeli woMphakathi ethi lezi zinkomo kwakufanele zinikezwe abanikazi bamapulazi abasafufusa.
UGardee wazwakalisa lesi sikhalo ngemuva kombiko weSunday Times owawusola ukuthi lezi zinkomo zazivela kowayenguNdunankulu waseNorth West, uMnuz Supra Mahumapelo.
Kusalindwe nesinqumo senkantolo eNkulu eGauteng ngokukhishwa kwakhe ejele ngoshwele wokugula ngo-Okthoba njengoba kunezinhlangano ezisiphonsele inselelo leso sinqumo.
Icala lakhe lenkohlakalo nenkampani yaseFrance, elithinta ithenda yezikhali, nalo lisaqhubeka enkantolo eNkulu eMgungundlovu.