UMalema uzophefumula ngemiphumela yokhetho kusasa
UMENGAMELI we-EFF uMnuz Julius Malema. Isithombe: Leon Lestrade. African News Agency/ANA.
UMHOLI we-EFF ongabonwa nangokhalo ezikhungweni ze-IEC ezibala amavoti, uMnuz Julius Malema, uzoba nesithangami nabezindaba ngoLwesine, ePitoli.
Selokhu iqalile ukungena imiphumela yokhetho uMalema akakathi vu kwabezindaba kanti nasezinkundleni zokuxhumana akandile ngamaningi kusukela ngoMsombuluko. I-EFF ikhiphe isitatimende imemezela ukuthi uMalema nobuholi be-EFF bazokhuluma nabezinaba kusasa.
Kushaye uLwesithathu ntambama ingakanqobi nowodwa umkhandlu i-EFF nakuba isibalo samavoti ewatholayo sinyukile kunaleso eyawathola ngo-2016.
Kushaye u-5 ntambama ngoLwesithathu i-EFF ihleli endaweni yesithathu ngo-10.33%, ilandela iDA (21.76%) ne-ANC (46.13%) uma kubalwa amavoti ezweni lonke.
EThekwini kushaye u-5 ntambama i-ANC isahamba phambili eThekwini ngo-42.92%, ilandelwa yi-DA eku-26.71% bese kuba yi-EFF esiqoqe u-10.14%. Uma izibalo zamavoti angenayo ziqhubeka ngale ndlela i-EFF ingase ibe nesandla ekutheni ubani ozophatha lo masipala.