Kuminze umfundisi eyothandazela abazalwane olwandle
KUBE nomunyu mndenini nakubazalwane bebandla lamaZayoni ebhishi eLa Mercy, eThekwini ngenkathi kuthathwa isidumbu somfundisi wabo, uMnuz Bhekumusa Hlophe ominze ngoMgqibelo ebusuku Isithombe: BONGANI MBATHA /African News Agency (ANA)
KUQHUME isililo, kwaba nomunyu nosizi kutholakala isidumbu somfundisi webandla lamaZayoni ngeSonto. Kuthiwa uminze olwandle ngoMgqibelo ebusuku ekhulekela abazalwane, ebhishi eliseLa Mercy, eThekwini.
Amakholwa okuthiwa abesuka eBuffelsdraai eVerulam, aficwe yithimba leSolezwe esafake izivatho izolo ekuseni.
Abeme izixongololo, ebheke isidumbu sikaMnuz Bhekumusa Hlophe ( 45), ebesilele enhlabathini yolwandle, simbozwe ngengubo yokulala. Eduze kwezimoto abefike ngazo ebhishi amakholwa, bekunezingubo zokulala obekukhomba ukuthi abezisonge ngazo.
Ngenkathi abasebenzi bemoto yezidumbu beyolanda isidumbu sikamufi, kuqhume isililo esixukwini samakholwa, amanye eduduzana. Kuthiwa umufi ubenamakholwa abeyowathandazela olwandle ngenkathi emuka ngabo - 10 ebusuku.
Onogada beReaction Unit South Africa ( RUSA) baphuthume endaweni yesigameko ngemumva kokuthola umbiko, obuvela kubantu abebesolwandle ngenkathi kumuka umfundisi.
“ Umufi kuthiwa ubeguqile ethandaza ngenkathi kuqhamuka igagasi elinamandla, elimthathe lamphonsa olwandle. Abazalwane nabantu abangu-10 abebekhona ngesikhathi kwenzeka isehlo, baqale bazama ukuthungatha umfundisi ngaphambi kokuthi babize ithimba leRUSA,” kubeka uMnuz Prem Balram.
Eqhuba uthe, ngokusho kukankosikazi kamfundisi, umufi ubehlele ukuyokhulukela abazalwane eNtaphuka, eNdwedwe kodwa wabatshela ukuthi umoya usumholela ukuthi ayokwenza umsebenzi wakhe olwandle. Amaphoyisa ophiko lwabatakuli okubikwa ukuthi aphuthume endaweni yesigameko, kuphoqelekile ukuthi ashiye phakathi ngoba ehluleka wukuthungatha ebumnyameni.
Ethintwa oyilungu lomndeni, utshele intatheli ukuthi akekho esimeni sokuxoxa ngalolu daba. “Asikho esimeni sokuxoxa nani. Anobuye nisithinte ngesinye isikhathi,” kusho ilungu lomndeni.
Okhulumela amaphoyisa KwaZulu - Natal, uCaptain Nqobile Gwala, usiqinisekisile isigameko somlisa ominze ngesikhathi ekhuleka.
“ Amaphoyisa esiteshi esisoThongathi avule idokodo lokufa. Kusaphenywa,” kubeka uCapt Gwala.