I-ANC iphawula ngoshintsho longqongqoshe

INHLANGANO esemandleni kuhulumeni KwaZulu-Natal, i-ANC, ithi ukushintshwa kongqongqoshe ababili baphambana ngeminyango yabo, akunayo inhloso embi ngaphandle kokuqinisa ukusebenza kukahulumeni.

UNdunankulu, uMnuz Sihle Zikalala, ngoLwesibili uthathe uNgqongqoshe Nomusa Dube-Ncube obephethe ezokuThuthukiswa koMnotho nezokuVakasha, wamfaka koweziMali.

Obephethe ezeziMali uMnuz Ravi Pillay, waya emnyangweni okusuke kuwona uNkk Dube-Ncube. UDube-Ncube ophethe nesikhundla sikaMgcinimafa we-ANC esifundazweni, ungumholi wemisebenzi kahulumeni esifundazweni.

Ungomunye wabaholi asebenisipiliyoni kuhulumeni wesifundazwe nakuyona inhlangano ebusayo.

Ushintsho belungalindelekile futhi lushiye abaningi bemangele. Kuke kwaba nemvunge nemibiko ethi kukhona ipolitiki edlalwayo ngoshintsho kodwa uZikalala wakuchitha lokho. Uthe ushintsho luhambisana nokubeka phambili izidingo zabantu.

Okhulumela i-ANC KwaZulu-Natal, uMnuz Nhlakanipho Ntombela uthi indaba yoshintsho ixoxwe kakhulu, izinsuku eziningi, kwathathwa isinqumo kubunjenwe.

‘’Isigungu esiphezulu se-ANC esifundazweni sihlalile izinsuku ezine, sacwaninga kabanzi ukusebenza kukahulumeni wesifundazwe. Sihlale nezinhlaka ezehlukene futhi ubuholi be-ANC buthintiwe ngalolu daba. Yinto efanayo nokuthi senze ushintsho kuMasipala weTheku naseMsunduzi,’’ kuchaza uNtombela.

Uthe amalungu abo ajutshwe kuhulumeni kufanele afunde ukuthi athunyelwe ukuyosebenzela abantu futhi asemseni wenhlangano, hhayi umuntu thizeni. Uthe kufanele bonke abajutshiwe basebenze ngokubambisana.

UNtombela uthe inhlangano isazoqhubeka nokubheka ukusebenza kukahulumeni kuwo wonke amazinga. Futhi uma kunesidingo soshintsho ngeke bacucuze ukulwenza.

Uthe bavule iminyango kuzo zonke izinhlaka ezifisa ukubeka imibono ngalolu daba.

UNGQONGQOSHE Nomusa Dube-Ncube

Izithombe: EZIGCINIWE

uNgqongqoshe Ravi Pillay