Izindaba

Kuboshwe iphoyisa laseNanda elibanjwe nenqwaba yamakhadi akwaSassa

Sakhiseni Nxumalo|Published

LIKHALELWE amasongo kaSigonyela iphoyisa lesifazane elibanjwe namakhadi eSouth African Socual Security Agency (Sassa) ngasePhoenix, eThekwini ngoLwesibili. Isithombe esigciniwe: Itumeleng English/African News Agency(ANA)

LIKHALELWE amasongo kaSigonyela iphoyisa laseNanda lesifazane elibanjwe namakhadi eSouth African Socual Security Agency (Sassa) ngasePhoenix, eThekwini ngoLwesibili.

Kuthiwa libanjwe namakhadi awu-49 akwaSassa nemali ebalelwa kuR2 350. Ebuzwa ngabanjwe ekuphethe umsolwa kuthiwa uhlulekile ukuchazela ozakwabo basePhoenix abavele bamgaxa ozankosi.

Amaphoyisa abambe umsolwa kulandela ukuthintwa yilungu lomphakathi libike ngomuntu okhipha imali kwi-ATM esebenzisa amakhadi ahlukahlukene akwaSassa.

Amaphoyisa athunyelwe imininingwane yemoto ebishayelwa umsolwa.

Okhulumela amaphoyisa KwaZulu-Natal uColonel Thembeka Mbele ukuqinisekisile ukuboshwa kwaleli phoyisa waveza ukuthi amaphoyisa asePhoenix aphenya icala lenkohlakalo nelokutholakala nempahla eyebiwe.

“Umsolwa ubanjwe namakhadi akwaSassa nemali ewuR2 350. Uzovela enkantolo yamacala athinta izimali eThekwini kusasa,” kuchaza uMbele.

Kuboshwa lo wesifazane nje ngenyanga edlule uNgqongqoshe wezokuThuthukiswa koMphakathi uNkk Lindiwe Zulu uveze ukuthi iSassa ilahlekelwe imali ebalelwa kuR282 million ngenkohlakalo eminyakeni emihlanu edlule.