Izindaba

I-SIU isaqhubeka nophenyo ngenkohlakalo okusolwa kuyo izikhulu

Themba Ntshingila|Published

OWAYEYISIKHULU esiphezulu kwiSouth African Broadcasting Corporation uMnuz James Aguma ongomunye wabantu abaphenywa yiSpecial Investigating Unit (SIU) Isithombe: IOL

INHLOKO yeSpecial Investigating Unit (SUI) u-Advocate Andy Mothibi, uthe basazoqhubeka nokwenza uphenyo oluthinta enkohlakalo ezikhungweni ezahlukene okusolwa izikhulu ngenkohlakalo kuzona.

Ubale uphenyo ngethenda elimayelana nenkohlakalo yokuthengwa kwezinsiza zokunqanda ukubebhetheka kwe-Covid-19, olwase-Life Esidimeni okwafa kulo iziguli ezathuthelwa ezikhungweni zezempilo ezazingekho esimeni esifanele, uphenyo lwethenda yakwaSABC nophenyo ngokulawulwa kombuso yidlanzana.

“Mayelana nenkohlakalo yokuthengwa kwezinsiza zeCovid-19, konke kuzoba kundunankulu waseGauteng ukuthi uwudedela nini umbiko walo,” kuchaza uMothibi.

Ngaphandle kophenyo abalwenzayo oluthinta okhulumela uMengameli Cyril Ramaphosa, uNkk Khusela Diko nowakwakhe noNgqongqoshe wezeMpilo kulesiya sifundazwe uDkt Bandile Masuku, uthe baphenya nesikhulu esangamele ezezimali kulo mnyango.

Mayelana nophenyo lwase-Life Esidimeni, uthe kunabantu abatholakala bethinteka ngezenzo ezingalungile, noabanye babo bagcina sebesulile emsebenzini.

“Ukwesula kwabo kwadalwa wuphenyo esasiluqalile. Labo bantu basazobekwa amacala ngabakwenza,” kusho yena.

NgokukaMothibi, basaqhubeka nophenyo oluthinta owayeyisikhulu sakwa SABC, uMnuz James Aguma nezinsolo zethenda ka-R62million phakathi kwale nhlangano yezokusakaza nenkamoni iLornavision okunezinsolo zokuthi kwaba nomgunyathi kuyona.

Uthe kuneminye imininingwane abasayilindele kwibhodi ephethe njengamanje kwaSABC okuyiyona ezobasiza bakwazi ukuqhubeka nophenyo lwabo.

“Amanye amandla esinikezwe wona ukuthi sibuyise imali kulezo zikhulu ezisolekayo enkohlakalweni, bese iNational Prosecuting Authority ingenelela ngokuthi ishushise abasoleka emacaleni enkohlakalo,” usho njalo.

Uthe nase-Eastern Cape basazogasela nakhona bayokwenza uphenyo njengoba kusoleka neminyango kahulumeni eyahlukene ngenkohlakalo kumasipala i-OR Tambo.