Izindaba

Bafuna uphenyo ngokulamba kwabagonqile e-Addington

Zanele Mthethwa|Published

I-IFP ifuna kuphenywe ngezinsolo zokubhuqwa yindlala kweziguli ezigonqile esibhedlela i-Addington eThekwini I-IFP ifuna kuphenywe ngezinsolo zokubhuqwa yindlala kweziguli ezigonqile esibhedlela i-Addington eThekwini

SEKUQUBUKE izinsolo zokuthi kuneziguli ezigonqe esibhedlela saseThekwini ezihaqwe wubhubhane iCovid-19, okuthiwa zibhuqwa yindlala. Lezi zinsolo zivezwe ngoyilungu le-IFP omele ikomiti lezempilo esiShayamthetho KwaZulu-Natal, uNkk Ncamisile Nkwanyana.

Leli qembu seliphonsele inselelo uNgqongqoshe woMnyango wezeMpilo KwaZulu-Natal, uNkk Nomagugu Simelane-Zulu, ukuthi aphenye ngalezi zinsolo ezibhekiswe esibhedlela i-Addington.

UNkk Nkwanyana uthe sekukaningi ethola izingcingo ezigulini ezilaliswe esibhedlela i-Addington, zikhala ngendlala.

“Ngithole izingcingo ngitshelwa ukuthi kuneziguli ezingasidlanga isidlo sasekuseni, ezinye zithole iphalishi kuphela. Kuthe uma ngithinta ababhekele iziguli ezigonqile kulesi sibhedlela, bavuma ukuthi kukhona ezithole iphalishi kuphela kanti ezinye azilitholanga ngoba kunenkinga yokushoda kokudla. Ngiyazibuza ukuthi ingabe sekunesikhathi esingakanani kungekho ukudla okwanele kulesi sibhedlela njengoba kuthiwa inkampani ekulethayo iyashodelwa,” kusho uNkk Nkwanyana.

Uthe kuyathusa ukuthi abaphathi balesi sibhedlela bathule bathini ngalokhu.

“Sinxusa ungqongqoshe wezempilo ukuthi aphenye ngokushesha ngalolu daba. Kumele atshele umphakathi ukuthi yiziphi izinhlelo anazo ukuqinisekisa ukuthi iziguli ezigonqile kulesi sibhedlela ziyakuthola ukudla nsuku zonke,” kusho yena.

UNkk Nkwanyana uthe uphenyo lukangqongqoshe kumele luveze ukuthi inkampani eletha ukudla kulesi sibhedlela iyona yini enenkinga. Ukhale nangokuthi sekukaningi kunezinto ezingahambi kahle kulesi sibhedlela, okukhombisa ukuthi abaphathi bakhona babudedengu.

Uthe uma kuyinkampani eletha ukudla enenkinga kumele ichithwe kufunwe enye noma kuthathelwe izinyathelo abaphathi base-Addington uma benephutha. Akukona okokuqala esifundazweni ukuthi kuvele izinsolo zezinkinga zokudla kwabagonqile ezibhedlela.

Ngo-Ephreli kwavela ukuthi iziguli ezigonqe esibhedlela iClairwood eThekwini, zikhala ngokudla okonakele. Ezinye zalezi ziguli zabhala nasezinkundleni zokuxhumana ziveza izithombe zokudla osekonakele.

Kushaye isikhathi sokuloba uMnyango wezeMpilo esifundazweni uthe usalinde umbiko e-Addington, okuze kwashicilelwa ungaphendulanga.