Zizovulelwa amacala izikhulu ezithinteka enkohlakalweni yethenda yeCovid-19
UNDUNANKULU waKwaZulu-Natal uMnuz Sihle Zikalala omemezele ukuthi zizovulelwa amacala izikhulu zikahulumeni wakulesi sifundazwe ezisoleka enkohlakalweni yethenda yokuthenga izinsiza zeCovid-19 Isithombe: BONGANI MBATHA /African News Agency (ANA) UNDUNANKULU waKwaZulu-Natal uMnuz Sihle Zikalala omemezele ukuthi zizovulelwa amacala izikhulu zikahulumeni wakulesi sifundazwe ezisoleka enkohlakalweni yethenda yokuthenga izinsiza zeCovid-19 Isithombe: BONGANI MBATHA /African News Agency (ANA)
ZIZOTHATHELWA izinyathelo zomthetho izikhulu zikahulumeni ezithinteka emkhonyovini wethenda lezingubo nezinsiza ezaziqondene neCovid-19 KwaZulu-Natal.
Usho kanje uMnuz Sihle Zikalala onguNdunankulu wakulesi sifundazwe ngoLwesibili eThekwini.
Ubechazela abezindaba ngombiko wophenyo obujutshwe yihhovisi lakhe ngezinsolo zokuthi kunobhlankethi, izifonyo nezifutho ezibulala amagciwane okuphathelene neCovid-19, okungazange kuhambe ngendlela efanele ngenkathi kufakwa ithenda yokuthenga lezi zinsiza.
Ngaphandle kokuthathela izikhulu zikahulumeni izinyathelo zomthetho, uthe nalabo ababesebenzisana nomnyango wokuThuthukiswa koMphakathi nowezeMfundo ekuthunyelweni kwalezi zinto emphakathini, nabo bazovalwa ekutheni baphinde basebenzisane nohulumeni uma sekuphothulwe uphenyo.
Ngokuka Zikalala, kunemigomo eyaphulwa phakathi kwabasebenzisana nohulumeni nezikhulu zale minyango ngamanani alezi zinsiza njengoba enziwa aphezulu ngokuxakile.
“Umbiko uthole ukuthi kwaba nokungahambisi ngendlela efanele kwezikhulu zikahulumeni ngoR19million wokuthengwa kobhankethi, no-R22million wokuthengwa kwezinsiza (izifonyo, izifutho ezibulala amagciwane eCovid-19),” kusho uZikalala.
Ngokusho kwakhe, abasebenzisana nohulumeni bakhokhelwa imali yonke bengakawenzi umsebenzi wabo wokuthumela izinsiza esezibaliwe ngokwesivumelwano.
“Kuno-R16million owakhokhelwa izinkampani ezisebenzisana nohulumeni kodwa zibe zingawenzeka umsebenzi.
“Kuze kube yimanje lezi zinkampani zisasabalalise kuphela obhlankethi abangu-4,892, okuchaza ukuthi abangu-43,000 kuyimanje baseduve lapho okugcinwa khona impahla, futhi sebaze bonakala,” kuzikhalela uZikalala.
Ngokuka Zikalala, kulindeleke ukuthi uma uphenyo seluphothuliwe, izinkampani ezazisebenzisana nohulumeni, zilandelwe ukuze zibuyise imali ezayithatha kodwa zangawenza umsebenzi okwakuvunyelwene ngawo.
Uthe lo mkhonyovu usudale ukuthi kube no-R15million osulahlekile ngendlela engaqondakali oyimali yabakhokhi bentela kulesi sifundazwe.