Kuhlehle iKhomishini abebezofakaza kuyona bekhala ngokungatshelwa kusenesikhathi
UMNUZ Linda Mti owayenguKhomishana wamaJele nokuHlumeleliswa kwesiMilo kuleli ongakwazanga ukuvela phambi kweKhomishini kaZondo ngoLwesibili ephenya ngokulawulwa kombuso yidlanzana ngenxa yokuthi ekhala ngokwaziswa isikhathi sesisincane sokuthi avele kuyona, ekubeni ubengenayo imininingwane yokuthi kumayelana nani Isithombe: ANA UMNUZ Linda Mti owayenguKhomishana wamaJele nokuHlumeleliswa kwesiMilo kuleli ongakwazanga ukuvela phambi kweKhomishini kaZondo ngoLwesibili ephenya ngokulawulwa kombuso yidlanzana ngenxa yokuthi ekhala ngokwaziswa isikhathi sesisincane sokuthi avele kuyona, ekubeni ubengenayo imininingwane yokuthi kumayelana nani Isithombe: ANA
KUPHOQE ukuthi ingahlali iKhomishini kaZondo ngoLwesibili ephenya ngokulawulwa kombuso yidlanzana kulandela ukunganeliseki komele owayenguKhomishana wamaJele nokuHlumeleliswa kwesiMilo, uMnuz Linda Mti neMantshi eNkulu yasePitoli, uMnuz Desmond Nair.
NgokukaMnuz Schalk W Van der Merwe omele uMti, okudale uMti ongakwazi ukuvela phambi kwale Khomishini ngoLwesibili, ukuthi uzwe sekusele isikhathi esincane ukuthi kuzomele avele phambi kwayo.
Ngokommeli kaMti, bekumele aziswe kusasele izinsuku ezingu-14 ukuthi kuzodingeka ukuthi avele phambi kwayo.
Ngokommeli kaNair, u-Advocate Danie Dorfling SC, uNair ubezimisele ukufakaza ngalolu suku kodwa wanqindwa wukuthi iKhomishini ibingakaqedi ngemininingwane obekumele imthumelele yona echaza ukuthi kungani kumele avele phambi kwayo.
Bobabili uMti noNair, bekumele bavele kule Khomishini emva kokuthi owayeyisikhulu seBosasa, uMnuz Angelo Agrizzi, watshela iKhomishini kaZondo ukuthi bayathinteka enkohlakalweni yokufumbathiswa ngowayeyisikhulu sale nkampani, uMnuz Gavin Watson ongasekho emhlabeni.
Ngokuka-Agrizzi, uNair uthinteka ngokwenziwa kangcono komuzi wakhe yiBosasa.
Kwenzeka lokhu nje ngoMsombuluko owayenguNgqongqoshe wezeMvelo kuleli, uNkk Nomvula Mokonyane, ubevele phambi kwale Khomishini ngokwashiwo ngaye u-Agrizzi, ukuthi wayefumbathiswa ngo R50 000 nyanga zonke nguWatson ngenhloso yokuzitubuzela amagabade wokuthola amathenda kuhulumeni.
Ngokobufakazi buka-Agrizzi, uNkk Mokonyane wayengumuntu onamandla kakhulu kwi-ANC, yingakho kwakugwazelwa yena ukuze izinto zisheshe zilunge.
Nakuba kunjalo, uNkk Mokonyane uziphikile zonke izinsolo ezenziwa ngu-Agrizzi ngaye, wathi wayengakaze ahlangane naye kwakhe njengokusho kuka-Agrizzi ebufakazini abethulela iKhomishini kaZondo.
Kulindeleke ukuthi kuthathe amasonto cishe amabili ukuthi uMti noNair bavele nini phambi kwale Khomishini.