Othisha ababili baseMphithi bafe engozini yemoto

UMNYANGO wezeMfundo KwaZulu-Natal usuphinde wagqemeka ingozi ngokushonelwa abanye othisha ababili abashone engozini yemoto kaGezubuso, eMgungundlovu.

Othisha ababili basesikoleni eKuhlekonke High bavelelwe yingozi ngoMsombuluko.

OMnuz Smiso Gavu noSbonelo Ndlovu bebefundisa uGrade 10, no-11. Bebefundisa iTourism nesiZulu. Ingozi kuthiwa yenzeke ngo-8 ebusuku.

Labo thisha bashona nje balandela omunye uthisha waseMasijabule High eSwayimane, uMnuz M. J Majola oshonile ngawo uMsombuluko.

Yena walimala kade kudutshulwa itekisi abebehamba ngayo ngenyanga edlule. Babeya esikoleni behamba nabanye othisha ngesikhathi bedutshulwa.

Labo thisha bashona nje ngoLwesihlanu olwedlule kudutshulwe kwabulawa uthishanhloko uMnuz Lindokuhle Madonsela, waseSibonise Primary, KwaMashu, ebangeni elingengakanani ukusuka esikoleni esegoduka.

Izolo uNgqongqoshe uMnuz Kwazi Mshengu udlulise amazwi enduduzo esikoleni nabasondelene nothisha ababili abashone engozini yemoto.

“Othisha bethu ababili basesikoleni saseKuhlekonke High, bashone engozini yemoto ngoMsombuluko. Siwumnyango sifisa ukudlulisa amazwi enduduzo emindenini yabashonile, othisha nabafundi. Izolo lokho (ngoMsombuluko) sibike ngokushona komunye uthisha (uMajola) ngaphansi kwesifunda uMgungundlovu. Lezi izikhathi ezinzima impela, sicela uNkulunkulu abaphe amandla bonke abathintekile nemindeni ezilile,” kusho uMshengu.

Okhulumela amaphoyisa uColonel Thembeka Mbele uqinisekisile ukuthi kunamacala okubulala ngokungenhloso avuliwe.

Imizamo yeSolezwe yokuba kutholakale ukuphawula kwemindeni yothisha nesikole abebefundisa kuso ayizange iphumelele izolo njengoba izinombolo zabo bezingatholakali kwaze kwashaya isikhathi sokushicilela.