I-Corona ivale izikhungo zokuhlolelwa ukushayela
SEKUVALWE izikhungo ezingaphezu kweziyishumi KwaZulu-Natal ngenxa yeCovid-19 Isithombe:Henk Kruger/African News Agency (ANA) SEKUVALWE izikhungo ezingaphezu kweziyishumi KwaZulu-Natal ngenxa yeCovid-19 Isithombe:Henk Kruger/African News Agency (ANA)
KUVALWE izikhungo ezingu-13 zokuhlolelwa ukushayela KwaZulu-Natal ngenxa yokuhlasela kwegciwane iCorona.
UMnyango wezokuThutha KwaZulu-Natal izolo uthumele isitatimende kwabezindaba uthi izikhungo zawo ezingu-13 zisavaliwe okwesikhashana ngenxa yokuthi kunabahaqwe yiCorona kuzo.
Umnyango uthe uzomemezela ukuthi zizovulwa nini.
Izikhungo ezithintekayo esaseShowe, Vryheid, Howick, Mooi River, Underberg - KwaSani, Hlabisa, Richmond, Utrecht, Nongoma, Newcastle, Rossburgh, Pinetown naseMkondeni.
“Kumiswe konke ukusebenza ezikhungweni ezingu-13 njengoba kukhona abasebenzi abathelelekile. Abasebenzi bangabodwana, balandela imithetho yokuzivikela yeCorona. Izakhiwo zonke zizokhucululwa.”
Kulezi zikhungo okumiswe ukusebenza kwazo, eziyisishiyagalombili ziphethwe omasipala bese kuthi ezine zingaphansi koMnyango wezokuThutha.
Ngokwesitatimende somnyango uma abezempilo sebebagunyazile bazozivula izikhungo bese bememezela emphakathini.
“Abaphazamisekile obekumele bahlolelwe izincwadi zokushayela bazonikezwa ezinye izinsuku uma sekuvuliwe. Ngeke bakhokhe enye imali ngokuhlehliswa kosuku lokuhlolwa kwabo.
Abadinga ukuthelela izimoto bangasebenzisa iPosi nezinye izindawo zikamasipala ezenza lowo msebenzi.
Umnyango uthe abantu bangathuki njengoba kunezinyanga ezintathu zesihle abanikezwe zona uNgqongqoshe wezokuThutha kuleli ukuba bakwazi ukuthelela izimoto zabo esezedlulelwe yisikhathi sokuthela.