Injabulo kwethulwa iWi-Fi esikoleni

KUBE yinjabulo yodwa kubafundi baseVezokuhle Primary eCaluza, eMgungundlovu, nomphakathi wonke bezothulelwa iWi-Fi yamahhala.

UNgqongqoshe wezokuXhumana kuleli uNkk Stella Ndabeni-Abrahams, noNgqongqoshe wezokuThuthukiswa koMnotho, ezokuVakasha, nezeMvelo uNkk Nomusa Dube-Ncube bathule lolu hlelo ngoLwesine kulesi sikole.

Abebehambele umcimbi batshelwe ukuthi sebezosebenzisa i-internet ngaphandle kokuyikhokhela njengoba kufakwe ama-hotspots, bashaye ihlombe bejabulela lolu hlelo.

“Kuyintokozo ukuba kuzothulwelwa uhlelo lwezokuxhumana yiJL Dube Broadband ihambisana noNgqongqoshe uNkk Ndabeni-Abrahams. Siyazi sonke ukuthi uDube wayengumholi oyithanda kakhulu intuthuko kubantu njengomholi wokuqala we-ANC. Njengoba uMengameli uCyril Ramaphosa ememezele uthaqa ngenxa yeCorona, kwande kakhulu ukuba abantu basebenzise ubucwepheshe ukuze baxhumane futhi bafunde. Lokhu akwenzekanga kalula emiphakathini eminingi kanjalo nakubantu abasha ngenxa yokubiza kwe-data. Lokhu kuphoqe ukuba sisheshise uhlelo lokulethela abantu ezobucwepheshe ngaphansi kohlelo iJL Dube Broadband. Namhlanje sizoxhuma ama-hotspots ayisithupha, sihlele ukuthi i-KZN igcine ixhunywe izindawo ezinga-hotspots ezingu- 20 500. Sifuna amalungu omphakathi abe ne-internet,” kusho uNkk

Dube -Ncube

Ama-hotspots axhunywe izolo, azokwenza kutholakale i-internet kulezi zindawo: eVezokuhle Primary nasemphakathini owakhelene nayo, e-Edendale Gateway Clinic; Umsunduzi Library; Umgungundlovu namaphethelo; Umsunduzi Taxi Rank, nasemgwaqweni- uLangalibalele nakwenzinye izindawo.

Kunabanye omasipala abazohlomula njengoba kuqalwe eMsunduzi, naseMgungundlovu, kuzoqhubekela nakumasipala, Amajuba, Umhlathuze, King Cetshwayo, eThekwini, uThukela naseKokstad.

Kuyoze kuqedwe isifundazwe sonke abantu befakelwa iWi-Fi yamahhala.

Kuthiwa lolu hlelo luzosungula imisebenzi kubantu abangu-2 million eminyakeni emihlanu ezayo kanjalo nezinye izindlela zokuthuthukisa umphakathi ngobucwepheshe.