‘Ubulawe ngamaphoyisa’ obedubula emoyeni

AMAPHOYISA athele othulini ngenhlamvu owesilisa waseNdwedwe okuthiwa kade ehamba edubula emoyeni, wabe esehlasela amaphoyisa.

Lesi sigameko senzeke oKhambeni, eNdwedwe, ngeSonto.

Kuthiwa umufi ubehamba edubula emoyeni, kwabizwa amaphoyisa.

Kuthiwa abe ukuqhamuka nje, umufi wavele wawadubula, aphendula ngezulu lezandla. Umufi ushonele endaweni yesigameko.

Okhulumela amaphoyisa KwaZulu-Natal, uColonel Thembeka Mbele, uthe umufi ubevele efunwa ngamanye amacala.

“Umsolwa oneminyaka engu-38 udubulane namaphoyisa, udutshulwe washona. Utholwe nesibhamu esingekho emthethweni. Uphenyo olusenziwe luveze ukuthi umufi ubefunwa ngecala lokugqekeza elibikwe esiteshini saseVerulam, ngo-Agasti 13, 2019. Ubefunelwa nelokuntshontshwa kwemoto elabikwa eNdwedwe. Kuphenywa icala lokushona komuntu, elokuzama ukubulala nelesibhamu esingekho emthethweni,” kusho uColonel Mbele.

Icala lokugqekeza kuthiwa kwathathwa isibhamu i-9mm pistol, ithelevishini, i-laptop neselula.