AmaWeseli agcwale itende aphula imigomo kathaqa KwaNongoma
ABAZALWANE ababonakala kwi-video yamaWeseli besondelene, enkonzweni okuthiwa bekungcwatshwa iphini likamengameli webandla kwaNongoma Isithombe:SITHUNYELWE ABAZALWANE ababonakala kwi-video yamaWeseli besondelene, enkonzweni okuthiwa bekungcwatshwa iphini likamengameli webandla kwaNongoma Isithombe:SITHUNYELWE
SEKUBIZWE umhlangano ophuthumayo nabaphathi bebandla lamaWeseli besifunda sakwaNongoma, emuva kwe-video esabalele ezinkundleni zokuxhumana ekhombisa amalungu ebandla ephambana nemigomo kathaqa.
Isolezwe linayo i-video okuthiwa iqoshwe ngempelasonto, ekhombisa abazalwane baseWeseli begcwele itende, bagaxane begida, abanye bexegise izifonyo ezilevini. Abazalwane abasetendeni babonakala bengaphezu kwesibalo sika-50 esinqunywe uMengameli Cyril Ramaphosa ngesikhathi kuvulwa amasonto ekuqaleni kwenyanga.
Ivideo efakwe kwiFacebook, ishaqise abaphawule kuyo bebabaza ukungayihloniphi imithetho kathaqa. Abanye bathe kumele bathathelwe izinyathelo abaholi bebandla abavumele lesi simo.
Okhulumela ibandla lamaWeseli kuzwelonke, uNkk Bongi Moyo-Bango, uthe sesisiyaziwa isifunda sebandla esithinteka kwi-video.
KUJUTSHWE uMbhishobhi Linda Mandindi ukusingatha udaba lwe-video yamaWeseli, ekhombisa abazalwane bephula imigomo kathaqa Isithombe: SIGCINIWE
Usigxekile lesi senzo, waqinisekisa ukuthi okwenzekile kuphambene nemithetho yebandla. Utshele Isolezwe ukuthi sekujutshwe uMbhishobhi Linda Mandindi ophethe iNatal Coastal Synod ukuthi asingathe lolu daba.
“Lonke ibandla latshelwa ngemigomo okumele ilandelwe ngesikhathi kuvulwa amasonto. UMbhishobhi Mandindi uzohlangana nabaholi, athole ukuthi kwenziwe yini ukuthi kungahlonishwa imigomo. Akekho umfundisi ongatshelwanga ngemigomo kathaqa yingakho lolu daba singeke siluthathe kancane,” kusho yena.
Kushayelwa uMandindi uqinisekisile ukuthi nguyena ozosingatha udaba, obekumele izolo abe nomhlangano nobuholi obuthintekayo. Uveze ukuthi akutholile ukuthi i-video iqoshwe ngempelasonto. Uthe bekungcwatshwa iphini likamengameli kwisekethe yakwaNongoma.
Ngokwemigomo kathaqa emenyezelwe uRamaphosa, akuvumelekile ukuhlangana kwabangaphezu kuka-50 ezinkonzweni noma emngcwabeni. Kugcizelelwe ukuthi ngisho enkonzweni kumele kugqokwe izifonyo, kugwenywe nokusondelana.
Akuvumelekile ngisho ukuxhawulana kodwa kwi-video kubonakala amadoda egida, egaxene, eshaye isikokela. Nasetendeni abanye abazalwane abangangenanga ngesikhathi kushaywa isikokela, babonakala begida phakathi bengayigcinile imigomo yokuqhelelana.