I-Covid-19 isibulale othisha abane

BANE othisha asebebulawe yiCovid-19 selokhu kuvulwe izikole ngenyanga edlule KwaZulu-Natal.

UNdunankulu waKwaZulu-Natal, uMnuz Sihle Zikalala, usho lokhu izolo esithangamini nabezindaba eThekwini, ecacisa ngesimo sezikole njengoba kuvula uGrade 11 no-6 kuleli sonto.

Uthe isifundazwe sineziguli eziwu-977 ezihaqekile, ezilaliswe ezibhedlela. Kuzo ziwu-694 ezisezibhedlela ezizimele neziwu-283 kwezikahulumeni.

Kothisha ababulawe yiCovid-19 uZikalala uthe babili abaseZululand, oyedwa eMzinyathi noyedwa eMlaza. Kushone nonogada wesikole esingadalulwanga esifundeni iLembe.

“Silindele ukuthi abahaqekile ezikoleni bazokwanda kodwa kuzolandelwa imigomo efanele kulabo abatholakalayo. Sandise ukuthengwa kwezinto ezibalulekile ukubhekana nesifo njengoba kuvulwa izikole.”

Bawu-429 asebehaqekile ezikoleni, isibalo esikhule ngo-242 ku-187 obubikwe ngesonto eledlule. Uthe bawu-306 othisha abahaqekile, abafundi (81) nabasebenzi bomnyango wezemfundo (42).

Isifunda uMgungundlovu sihamba phambili ngabawu-93 abahaqekile. Phakathi kwezifunda ezinezibalo eziphezulu kubalwa eMajuba (13), Harry Gwala, (33), Pinetown (66) oGwini (41) Umlaza (51) naseZuluand (29).

“Sithole ukuthi seziwu-345 izikole ezinabahaqekile. Ezikoleni eziwu-236 okwakubikwe ukuthi zinabahaqekile phambilini, eziwu-70 sezikulungele ukufunda nokufundisa. Bawu-39 obekubikwe ukuthi bahaqekile ezikoleni, okulindeleke ukuthi babuyele ungakashayi uLwesithathu,” kusho uZikalala.

Ugcizelele ukuthi benze konke okusemandleni ukulungiselela ukuvulwa kwezikole, wathembisa ukuthi alikho ikilasi elizobe lishoda ngothisha. Njengoba bekunezikhalo zokuthi kwezinye izikole amanzi awekho, uthe kukhishwe amathangi awu-3 425 nezindlu ezincane eziwu-1 060. Yize uZikalala ekhale ngokwenyuka kwezibalo zabahaqekile KwaZulu-Natal uthe akukafiki esibalweni esishaqisa kakhulu.

UNgqongqoshe wezeMfundo, uMnuz Kwazi Mshengu, ugcizelele ukuthi zimi ngomumo izikole.

Ukhale ngabazali bezikole ezisePhoenix, Chatsworth naseMerebank athe sebezisungulele esabo isigungu sabazali asisole ngokuba semkhankasweni wokuvala izikole.

“Kuzo zonke izinqumo esizithathayo sisuke sikhulumile nezigungu ezilawula izikole nezinyunyana zothisha. Sikhumbuza abazali ukuthi akekho ophoqiwe ukuyisa ingane esikoleni kodwa kumele kulandelwe imigudu efanele ukuze abhalisele uhlelo lokuzifundisela ekhaya,” kusho uMshengu.

Uxwayise nalabo somathuba abafuna ngodli umsebenzi wokwenza okokuvikela kwiCorona wathi alikho izwe elizobuswa ngenkani.

Uthe usuwandile umkhuba walabo abazibiza ngosomabhizinisi wokufuna ngodli izinto.