Kuboshwe isoka elibulele intombi liyidlokodla esithweni sangasese, yasikwa nezinqe
KUBOSHWE isokanomngani abasolwa ngokubulala ngesihluku intombi edlokodlwe esithweni sayo sangasese yasikwa nezinqe KUBOSHWE isokanomngani abasolwa ngokubulala ngesihluku intombi edlokodlwe esithweni sayo sangasese yasikwa nezinqe
KUBOSHWE isoka nomngani walo okuthiwa badlokodle intombi ebuntwini bayo, bayisika nezinqe eSiphezu, eShowe.
UNksz Nokubonga Ntombiyenkosi Shandu (29), ungeniswe esibhedlela saseShowe ngeSonto ebusuku emuva kokugcwelezwa.
Ushonele esibhedlela ngoLwesibili.
Umthombo uthe isoka lalisola intombi yalo ngokuqoma labe seliyihlasela nabangani balo.
Amaphoyisa abizwe esibhedlela ngalo uLwesibili emuva kokuba intombi ishonile.
Kuthiwa isoka nabangani balo bafika kubo kamufi bezohlasela. Bamkhiphela ngaphandle kwakubo base bemlimaza.
Abahlengikazi abebesiza umgilwa kuthiwa namanje basamangele ngenxa yesihluku abasibone kuye.
“Ngokusho kwabambonile kunzima noma badle ngenxa yendlela abelinyazwe ngayo. Bathe bebengakaze babone izinqe zowesifazane nobuntu bakhe kulinyazwe ngendlela obekulimele ngayo. Ubesezinhlungwini ezimangalisayo,” kusho umthombo.
Amaphoyisa abe esephenya abopha isoka (29) nomngani walo (21).
Baboshwe ngoLwesithathu khona eSiphezi.
Okhulumela amaphoyisa KwaZulu-Natal, uCaptain Nqobile Gwala, ukuqinisekisile okwenzekile wathi kuphenywa icala lokubulala.
“Kuboshwe abasolwa ababili oneminyaka engu-21 no-29 ngecala lokubulala owesifazane ona-29. Umufi ungeniswe esibhedlela ngeSonto enamanxeba amaningi okulinyazwa emzimbeni wonke. Ugcine ngokushona kwabe sekubizwa amaphoyisa. Kuphenywa icala lokubulala esiteshini saseShowe. Abasolwa bazovela enkantolo yamantshi maduze,” kusho uCapt Gwala.