Amagama aphambili kweze-ANCWL

ASEQALILE ukukhulunyelwa emakhoneni amagama abaholi abangase babange isikhundla sikamengameli we-ANC Womens League (ANCWL). Ubuholi obukhona sebuphelelwa yisikhathi kanti kulindeleke ukuthi kulungiselelwe ingqungquthela uma kudlula isiqubu seCovid-19.

Umthombo othembekile ozikhininda zonke izindaba zikaKhongolose uthi kukhulunywa noNksz Lindiwe Sisulu noNkk Nomvula Mokonyane abagaqele esikamengameli.

UNksz Sisulu unguNgqongqoshe woMnyango wezokuHlaliswa kwaBantu, aManzi nokuThuthwa kweNdle kanti uke wangenela nombango wokuba ngumengameli we-ANC ngo-2017.

UNkk Mokonyane ungomunye wabaqavile kwi-ANC futhi uke waba kwiKhabhinethi. Uphiko lwabesifazane kwi-ANC luvame ukuba nezwi nasekukhethweni kobuholi obuphezulu futhi lulwela ukuthi kube nabazolimela ezikhundleni.

Umthombo uthi ngamagama ababili ahamba phambili.

"Uma ubuka izinhlaka ze-ANC, zimelwe wukukhetha ubuholi, nentsha iyazama ukukhetha yize kulokhu kuhlehliswa. ULindiwe Sisulu noNomvula Mokonyane ngiyazi ukuthi bafuna esikamengameli,’’ kusho umthombo.

Njengamanje lesi sikhundla siphethwe nguNkk Bathabile Dlamini kuthi iphini lakhe kube nguNkk Sisi Ntombela, onguNdunankulu waseFree State.

EsikaNobhala siphethwe nguNkk Meogko Matuba.

Nakuba ingakakhulunywa ngokusemthethweni indaba yengqungquthela kodwa isikhathi sobuholi sesiphelile ngoba ingqungquthela yagcina ukuhlala ngo-2015 e-Irene, ePitoli, lapho kwakhethwa khona uNkk Dlamini ethatha izintambo kuNkk Angie Motshegka owayengumengameli.

Umthombo othembekile ozikhininda zonke izindaba zikaKhongolose uthi kukhulunywa noNksz Lindiwe Sisulu noNkk Nomvula Mokonyane abagaqele esikamengameli.

Okhulumela i-ANCWL kuzwelonke uNkk Tokozile Xasa akaphawulanga ngengqungquthela njengoba ucingo ubengalubambi engaphenduli nemiyalezo yeWhatsApp abethunyelelwa yona.

Umengameli uNkk Dlamini uthe usemhlanganweni uzobuye ashaye ucingo uma esenesikhathi kodwa kuze kwashaya isikhathi sokushicilela kungenzekanga.