Usukulungele ukuvulwa umgwaqo uM4 eThekwini
IZIKHULU zikahulumeni eziphambili esithombeni zihlola umgwaqo uM4 izolo. Kusukela kwesobunxele nguMnuz Simphiwe Nkosi woMkhandlu weTheku, uMnuz Thanduxolo Sabelo, ikhansela lomkhandlu, uMnuz Bheki Ntuli, onguNgqongqoshe wezokuThutha eKZN neBamba leNhloko yoMnyango wezokuThutha, uNkk Simanga Ngubo Isithombe: Bongani Mbatha/ANA IZIKHULU zikahulumeni eziphambili esithombeni zihlola umgwaqo uM4 izolo. Kusukela kwesobunxele nguMnuz Simphiwe Nkosi woMkhandlu weTheku, uMnuz Thanduxolo Sabelo, ikhansela lomkhandlu, uMnuz Bheki Ntuli, onguNgqongqoshe wezokuThutha eKZN neBamba leNhloko yoMnyango wezokuThutha, uNkk Simanga Ngubo Isithombe: Bongani Mbatha/ANA
USUPHELILE ukulungiswa umgwaqo uM4 phakathi kweSibaya noMhlanga eThekwini, obusuvalwe izinyanga eziyisithupha kulandela ukucekelwa phansi yizikhukhula ngonyaka odlule.
Lo mgwaqo okuthathe izinyanga ulungiswa, kulindeleke ukuthi uvulwe ngokusemthethweni ngesonto elizayo nguNdunankulu, uMnuz Sihle Zikalala noNgqongqoshe woMnyango wezokuThutha esifundazweni, uMnuz Bheki Ntuli.
UNtuli izolo uwuhlolile njengoba usulungisiwe ngaphambi kokuthi uvulwe ngokusemthethweni.
Ekhuluma nabezindaba ngemuva kokuhlola umgwaqo, uthe bayajabula ukuthi ukulungiswa kwawo sekuphelile, manje sekusele ukuthi bawudlulisele emphakathini ukuze ukwazi ukuwusebenzisa.
“Ukuvalwa kwalo mgwaqo bekuwuphazamisa umphakathi njengoba kade uphoqeleka ukuba usebenzise ezinye izindlela ngesikhathi umgwaqo usonakele,” kusho uNtuli.
Uthe ukusebenza ngokubambisana yikona okwenze ukuthi ukulungiswa kwawo kube yimpumelelo.
UMnuz Simphiwe Nkosi kaMasipala weTheku, uthe basebenzise ipayipi elisezingeni eliphezulu ukugwema ukuthi ungaphinde wenzeke umonakalo ofana
nalona.
Uthe leli payipi abalifakile likwazi ukumelana namanzi anamandla.
“Kuke kwakhona ukungaboni ngasolinye sithi akunyuswe imali yomsebenzi ukuze kusheshiswe umsebenzi kodwa iziphathimandla azizange zibone ngendlela esasisho ngayo kodwa sijabule ukuthi ekugcineni umsebenzi wenzekile futhi usuphelile,” kusho uNkosi.
Okhulumela uMnyango wezokuThutha
KwaZulu-Natal, uMnuz Kwanele Ncalane, uthe imininingwane mayelana nokuthi ukulungiswa kwalo mgwaqo kudle malini, kuzodalulwa ngundunankulu ngelizayo esewuvula.