I-ANC isukumela eyamakhansela akhwabanisa izijumbana zokudla

I-ANC KwaZulu-Natal ithi kukhona ukungahleleki kahle kwezinto ohlelweni lokwaba izijumbana zokudla ezenzelwe ukubhekelela abantu abahlwempu njengoba kuvaliwe ukwenza izinto ngokwejwayelekile ezweni.

Okhulumela i-ANC KwaZulu-Natal, uMnuz Ricardo Mthembu, uthe zingena zilekanyana izikhalo ngamakhansela okuthiwa ashaya isikhekhelembana uma ekhipha izijumbana, anikeze obhululu bawo nabangamalungu amaqembu abo.

UMthembu ubephendula emuva kwesikhalo sezakhamuzi zaseMpendle ku-ward 2 ezigodini eMadiphini, eQutshini, eNguga naseNtshiyabantu.

Esinye isakhamuzi sikhulume nephephandaba sacela ukungadalulwa, sithe izinto azihambi neze kahle ngokukhishwa kwezijumbana.

“Sigcine ukubona ukudla kufika ngezimoto, asikaze sithole lutho kodwa kunikezwa abantu abavele besebenza thina sisale sincela izithupha. Ibuhlungu le nto ngoba umengameli wakubeka kwacaca wathi akunikezwe abahluphekile, akashongo ukuthi akunikwane ngamaqembu epolitiki.

“Siswele, silambile, asikwazi nokuya ematohweni njengoba kuvalwe konke,’’ kubalisa isakhamuzi.

Kuthiwa abanye eMpendle batshelwe ukuthi wukudla kwe-ANCWL abanye ngeke bakuthole.

Ikhansela lendawo alitholakalanga njengoba izinombolo zalo zombili bezingangeni, udaba lwadluliselwa ehhovisi le-ANC esifundazweni.

Kuvela isikhalo saseMpendle nje, zingena zilekanyana zivela ezindaweni ezehlukene kukhalwa ngenkohlakalo yezijumbana zokudla okuthiwa yenziwa ngamakhansela.

UMthembu we-ANC uthe kukhona ukubhimba kulabo abahambisa izijumbana futhi kumele kulungiswe ngokushesha.

“Siyazithola izikhalo nsuku zonke futhi sifisa uma kuyiqiniso lokhu, kuvele obala, sibhekane nalabo baholi.

“Kuyasiphoxa kakhulu ukuvela kwento enjalo kodwa kubuye kungahleleki kahle kulabo abasingethe uhlelo.

“Bakhona nalabo abasuke belethe izijumbana ngoba befuna ukuthola udumo nje banganaki ukuthi banika abantu abanjani,’’ kusho uMthembu.

Uthe ngeke i-ANC ihlale isonge izandla kube konakala ngoba yisikhathi sokuba abantu babe nobuntu.