Izindaba

Bafuna omusha ozohola isifunda se-ANC

KHETHA SANGWENI|Published

USEKULUNGELE ukuthatha esokuba wusihlalo wesiFunda se-ANC eGeneral Gizenga Mpanza uMnuz Khonzuyise Ngidi okumanje ophakanyiselwe kulesi sikhundla Isithombe : SITHUNYELWE USEKULUNGELE ukuthatha esokuba wusihlalo wesiFunda se-ANC eGeneral Gizenga Mpanza uMnuz Khonzuyise Ngidi okumanje ophakanyiselwe kulesi sikhundla Isithombe : SITHUNYELWE

UPHEKWE wavivinywa ezinhlakeni zentsha ye-ANC, umholi wayo ophakanyiselwe esikhundleni sikasihlalo wesiFunda, iGeneral Gizenga Mpanza, uMnuz Goodman Khonzuyise Ngidi (38) owaziwa ngoKhonza.

Igama lesifunda lisanda kushintshwa laqanjwa kabusha ngenhloso yokuhlonipha isishoshovu se-ANC uGeneral Gizenga Mpanza. I-ANC kulesi sifunda inomthwalo wokubusa omasipala abaningi kubalwa owesiFunda iLembe, iMandeni, Ndwedwe, Maphumulo neKwaDukuza.

Bazobe belwela ukubabuyisela ezandleni zabo emuva kokhetho lomasipala ngonyaka ozayo.

I-ANC KwaZulu-Natal ilungiselela ukuhlalisa izingqungquthela zezifunda zayo ukuze kufike ukhetho sebemi ngomumo. Isolezwe ngeSonto lixoxa nalabo abaphakanyiselwe ezikhundleni, lizwe kabanzi ngempilo namava abanawo. Amagatsha aseqalile ukukhuluma indaba yobuholi njengoba ethi uNgidi akaphakame athathe isihlalo. Kunemibono ethi seluqinile ukhakhayi kuNgidi, sekufanele angene esikhundleni esiphezulu, ipolitiki useyiqonda kabanzi njengoba ubephuma engena ezikhundleni eziqavile. Ingqunguthela yaseGeneral Gizenga Mpanza ibhekwe ngamehlo abomvu nemikhankaso ewumshoshaphansi isivele iqalile esifundeni. Lesi sifunda singezinye ezigunyazwe yi-ANC ukuba zikhethe ubuholi kepha izingqungquthela zisamisiwe ngenxa yemizamo yokunqanda ukubhebhetheka kweCorona.

UNgidi uzalelwe KwaSonkombo, eNdwedwe okusho ukuthi ungumkhaya kaSihlalo we-ANC KwaZulu-Natal, uMnuz Sihle Zikalala osenguNdunankulu wesifundazwe. Engxoxweni kuvelile ukuthi uNgidi uyindoda eganiwe yabusiswa ngezingane ezine. Ufunde ipolitiki ezinhlakeni ze-ANCYL.

Ngo-2004 ukhethelwe kwesikaNobhala wegatsha le-ANCYL elibizwa ngeSiyaya, wasebenza ngempumelelo ehola intsha ekhulisa nesibalo sabajoyinayo. Ngo-2006 ukhethelwe kwesikaSihlalo wegatsha elifanayo. Ngaleso sikhathi ubengumholi wePhalamende leNtsha eNdwedwe lapho bekuhlalwa khona kuxoxwe ngezinkinga nezidingo zabantu abasha endaweni.

Ubephinde aphathe nesikhundla seSafety Policing Forum ebhekelele ukuphepha nokulwa nobugebengu endaweni, nakhona wasebenza kahle wazakhela ugazi kubantu bemthemba ngokuphepha kwabo.

Ngo-2007 ukhethwe ukuba yilungu elengeziwe kwi-ANCYL, eGeneral Gizenga Mpanza amahlandla amabili. Uke waba yiphini likasihlao we-ANCYL khona esifundeni esifanayo. Ukhethwe waba yiPhini likaSihalo we-ANC eGeneral Gizenga Mpanza.

Ubambe njengosihlalo we-ANC esifundeni, emuva kokuthi obewusihlalo, uMnuz Ricardo Mthembu ebizwe ukuyosebenza esiShayamthetho sesifundazwe kwase kuvuleka isikhala. UMthembu uphinde abe nguMkhulumeli we-ANC KwaZulu-Natal.

Kumanje uNgidi uphethe isikhundla sokuba wuSomlomo kuMasipala waseNdwedwe asithathe ngo-2016 emuva kokhetho lohulumeni bezindawo. Ihlandla lakhe lizophela maduze njengoba kusondela ukhetho ngonyaka ozayo.