Icele ikhefu imenenja yeTheku ebhekene necala lenkohlakalo

ICELE ukuhlaba ikhefu lamasonto amabili isekhaya imenenja kaMasipala weTheku, uMnuz Sipho Nzuza, ebivele enkantolo kuleli sonto, ngecala lenkohlakalo.

UNzuza othole ibheyili kaR50 000, ufake isicelo sekhefu sagunyazwa ngoLwesihlanu. Kulindeleke ukuthi abuyele enkantolo ngo-Ephreli 16.

Leli phephandaba lithole ukuthi uNzuza ubhalele iMeya uMnuz Mxolisi Kaunda incwadi ecela ukuthi gozololo ngasekhaya abhekane nezindaba zakhe.

UNzuza njengoba eboshiwe ungummangalelwa ka-17 futhi umangalelwe nenqwaba yabanye kubalwa nosomabhizinisi nezinye izikhulu.

Kunethimba elikhethekile eliphume umkhankaso wokubopha abathinteka ezenzweni zenkohlakalo kulo masipala.

Okhulumela uMasipala weTheku, uMnuz Msawakhe Mayisela uthe: “Okwamanje isikhundla sikaNzuza sizobanjwa wuMnuz Sipho Cele ngenhloso yokuqinisekisa ukuthi umsebenzi kamasipala uyaqhubeka. Siyawuqinisekisa umphakathi ukuthi konke lokhu ngeke kuphazamise ukuhanjiswa kwezidingo.’’

UMayisela uchaze uCele njengomunye omnkantshubomvu kwezokuphatha ngoba kumanje uphethe isikhundla ophikweni lwezokuBusa nobuDlelwane naMazwe.

UNzuza usotakwini ngendaba yethenda okuthiwa wayelulela isikhathi emuva kokuba sesiphelile isivumelwane sayo nomasipala.

Amaqembu aphikisayo kuMasipala weTheku abelokhu ephakamise ukuthi uNzuza amiswe esikhundleni ngoba izinsolo abhekene nazo zibucayi.

UNzuza uziqinisekisile izindaba zekhefu lakhe wathi lizomsiza ukulungisa ezinye izinto ezithinta yena.

Uthe icala ngeke liphazamise umsebenzi wakhe, konke kuzoqhubeka kahle.

Uthe imibiko ethi uzoba wufakazi woMbuso kayilona iqiniso.