Kusolwa umkhuba ekhaya ngotholwe emotweni yakhe eseshonile esonakele

UNUKANA wodwa umndeni wowesifazane waseKhula Village, eMtubatuba okutholwe isidumbu sakhe sisongwe ngengubo yokulala, safihlwa emuva kwezihlalo zeveni yakhe emgwaqweni uN2 ngoLwesithathu ebusuku.

Isidumbu sikaNksz Nomusa Myeni (40) sitholwe sesiqala ukonakala emotweni yakhe ebikhiyiwe, yalaxazwa emgwaqweni uN2 ngaphansi kwebhuloho KwaMbonambi.

Ikhansela lendawo, uMnuz Siyabonga Khumalo, lithe umndeni ulithinte ngoLwesithathu ulazisa ngokunyamalala kukaNksz Myeni.

“Kuthiwa waphuma ekhaya ngoLwesibili ekuseni, eyofuna izinsimbi azidayisayo. Umndeni uqale ukuthuka engabuyi ekhaya ntambama, ungasamtholi nasocingweni. Ngifake isithombe sakhe nezinombolo zemoto yakhe kwiFacebook, ngicela usizo. Emuva kwemizuzu emihlanu ngithintwe ngumuntu obone imoto ipakile kuN2,” kusho uKhumalo.

Uthe ngempela banikele khona namaphoyisa, bayifica imoto ebinephunga eliphuma phakathi.

“Kudingeke ukuthi kuphahlazwe amawindi okuyilapho esibone khona isidumbu sikamama ebesesonakele, sigoqwe ngengubo sifakwe emuva kwezihlalo zemoto. Ithimba lezokutakula lize lasika izihlalo nezicabha zemoto ukuze kukhishwe isidumbu,” kusho uKhumalo.

Uthe umndeni uyalele yena ukuthi akhulume nabezindaba njengoba usakhungathekile ngokuwehlele.

Ngokusho komthombo osondelene nomndeni, umndeni usola ukuthi umkhuba ungaphakathi.

“Bakholelwa wukuthi umama ubulawe wumuntu omaziyo. Imoto yakhe ibivalwe amawindi, ikhiyiwe. Kukhona abamsolayo asondelene naye, abekade behlala ngokuxabana naye. Wuphenyo lwamaphoyisa oseluzolekelela,” kusho umthombo.

Okhulumela amaphoyisa KwaZulu-Natal, uCaptain Nqobile Gwala, uthe amaphoyisa aKwaMbonambi aphenya icala lokubulala emuva kokutholakala kwesidumbu sowesifazane emotweni ebikhiyiwe.

“Bafike bathola ukuthi isidumbu sowesifazane oneminyaka engu-40, owabikwa ukuthi unyamalele ngoLwesibili. Ubenomaka wokuklinywa emqaleni, embozwe ngengubo yokulala. Amaphoyisa asaphenya imbangela yokubulawa kwakhe,” kusho uGwala.