Amaphoyisa athole izidakamizwa zifihlwe ethayini lemoto
KUTHOLWE izidakamizwa ezingabiza uR2 million kuleli sondo lemoto evinjwe ngasemngceleni waseMozambique. Isithombe: SITHUNYELWE KUTHOLWE izidakamizwa ezingabiza uR2 million kuleli sondo lemoto evinjwe ngasemngceleni waseMozambique. Isithombe: SITHUNYELWE
LILINGANISELWA ku-R2 million inani lezidakamizwa ezitholwe amaphoyisa zifihlwe ethayini lemoto eliyisipele emngcele waseMozambique, esifundazweni sakwaZulu-Natal.
Kubikwa ukuthi ngabo-12.30 ngoLwesibili emini, amaphoyisa asesiteshini sasePhongolo atshelwe ngemoto ebisuka eMozambique ebisolwa ngokulayisha izidakamizwa idlula emngceleni wakuleli.
Okhulumela amaphoyisa KwaZulu-Natal uBrigadier Jay Naicker, uthe amaphoyisa agasele emzileni womngcele, nokuyilapho bebone khona lemoto iqhamuka kumgwaqo u-N2.
“Amaphoyisa avimbe lemoto, ayisesha. Kutholwe iheroin engu-15 KG ifihlwe ethayini lemoto eliyisipele. Imali engatholwa ngalezi zidakamizwa ibalelwa ku-R2,7 million. Umsolwa ongowesilisa (40) uboshwe ngecala lokushushumbisa izidakamizwa,” kuchaza uNaicker.
Icala lokushushumbiswa kwezidakamizwa livulwe esiteshini samaphoyisa oPhongolo, ladluliselwa kuphiko lwabaseshi oKlebe(Hawks) okuyilona oseluzoqhubeka nophenyo.
UKhomishana wamaphoyisa KwaZulu-Natal uLieutenant General Khombinkosi Jula ubongele amaphoyisa ngomsebenzi omuhle.
“Siyakuncoma ukutholwa kwezidakamizwa eziningi ngalendlela. Lo msebenzi ungomkhulu kulesi sifundazwe futhi ukhombisa ukuthi amaphoyisa azimisele ukunqanda ubugebengu emgceleni njengoba sekungamaholidi,” kusho uJula.
IMOTO ebihamba umsolwa obanjwe nezidakamizwa ezingabiza izigidi zamarandi kuleli. Isithombe: SITHUNYELWE
NgoMeyi wango-2017, amaphoyisa asoPhongolo avimba iveni elalidlula emncgeleni oseGolela liphethe izidakamizwa. Lemoto yavinjwa emgwaqeni uN2 ngasoPhongolo, kwatholakala izidakamizwa iheroin ifakwe ezikhwameni ezingu-145.
Imali yalezi zidakamizwa yayilinganiselwa ku-R101 million. Abasolwa okungabesilisa ababili nowesifazane baboshwa ngamacala okushushumbisa izidakamizwa. Abasolwa bavela eNkantolo yeMantshi oPhongolo.