Amaphoyisa ashaqe izibhamu erenki eThekwini
USAQHUBEKA nokuvuna izithelo umkhankaso wamaphoyisa wokuthungatha izibhamu ezingekho emthethweni KwaZulu-Nata. Namhlanje amaphoyisa amathole izibhamu erenki yamatekisi ngakuWarwick Avenue. Isithombe: NQOBILE MBONAMBI African News Agency (ANA) USAQHUBEKA nokuvuna izithelo umkhankaso wamaphoyisa wokuthungatha izibhamu ezingekho emthethweni KwaZulu-Nata. Namhlanje amaphoyisa amathole izibhamu erenki yamatekisi ngakuWarwick Avenue. Isithombe: NQOBILE MBONAMBI African News Agency (ANA)
ABUYE nezibhamu ezinhlanu amaphoyisa abegasele erenki yamatekisi esondelene nemakethe, maphakathi nedolobha iTheku ngoLwesibili.
Amaphoyisa afike kwancane indawo ezohlola njengoba eqhuba uhlelo lokuqoqa izibhamu nezinhlamvu ezingekho emthethweni KwaZulu-Natal.
Okhulumela amaphoyisa uBrigadier Jay Naicker uthe kutholwe izibhamu ngenkathi amaphoyisa egasela erenki yamatekisi ngaseWarwick Avenue, emgwaqeni uJulius Nyerere.
Ukutholwa kwalezi zibhamu kuzoshayelwa ihlombe kwazise amaphoyisa aseqale uhlelo lokuqoqwa kwezibhamu oluzophela ngemuva kwezinyanga eziyisithupha. Uhlelo lokuqoqwa kwezibhamu luqale ngoDisemba 1 kanti luzophela ngoMeyi 1, ngonyaka ozayo.
Amaphoyisa aKwaZulu-Natal aqhuba uhlelo lokuqoqa izibhamu, aseshaqe izibhamu ezibalelwa ku-1000 nonyaka.
Ukuqoqwa kwezibhamu kuzonikeza abanikazi bezibhamu ithuba lokufaka isicelo sokuvuselela amalayisense uma bengakawavuseleli.
IKhansela uMnuz Ntandoyenkosi Khuzwayo uncome umsebenzi wamaphoyisa. Uthe ubengazi ngokugasela kwamaphoyisa kodwa umsebenzi wabo uyancomeka ngoba abantu bayashona ngenxa yezibhamu.
Ngesonto eledlule, ithimba leProvincial Drug and Firearm Unit belunohlelo lokunqanda ubugebengu ePinetown naserenki yaseNanda eSoldiers Way.
Amaphoyisa agasele komunye umuzi ePinetown, abopha owesifazane (34), otholwe nezidakamizwa icocaine ezilinganiselwa ku-R10 000 uma zidayiswa.
Amaphoyisa abophe umsolwa obedayisa izidakamizwa erenki yamatekisi eNanda. Umsolwa utholwe namaphilisi angu-564 esidakamizwa iheroin kanye ne-cocaine engu-32. Lezi zidakamizwa ezishaqiwe zilinganiselwa ku-R20 000 uma zidayiswa.