Ayaphela amahlathi kuZuma kwelenkohlakalo
OWAYENGUMENGAMELI wezwe uMnuz Jacob Zuma. Isithombe: Michele Spatari/Pool via AP/African News Agency (ANA) OWAYENGUMENGAMELI wezwe uMnuz Jacob Zuma. Isithombe: Michele Spatari/Pool via AP/African News Agency (ANA)
AYAPHELA amahlathi kowayengumengameli wakuleli uMnuz Jacob Zuma okuchithwe isicelo sakhe sokuthi kuhoxiswe amacala enkohlakalo abhekene nawo eNkantolo eNkulu eMgungundlovu ngoLwesihlanu.
Ekhuluma enkantolo ngeledlule u-Advocate Muzi Sikhakhane ongummeli kaZuma, uphakamise ukuthi enye inkantolo ibingathatha isinqumo esihlukile kuleso sango-Okthoba esakhishwa amajaji uJerome Mnguni, Esther Steyn noThoba Poyo-Dlwathi. Ngo-Okthoba inkantolo yanquma ukuthi uZuma nenkampani yezikhali kumele bashushiswe ngamacala enkohlakalo athinta ukuthengwa kwezikhali. USikhakhane uthe amajaji enza "amaphutha emthethweni" ngokufinyelela esinqumweni.
Inkampani yezikhali iThales nayo iphakamise ukuthi enye inkantolo ingathatha isinqumo esihlukile, ekubeni ibisho iphindelela ukuthi angeke le nkampani ithole ukwahlulelwa okuyikho uma icala lifinyelela kuleso sigaba. Le nkampani isifake isicelo sokulalelwa ngaphambi kwe-Apex Court.
UJaji Mnguni ufunde isinqumo ngoLwesihlanu, eshiya okunye ngaphandle, ethi amajaji "abambene nokunye".
"Isicelo sikaZuma sokucishwa kwamacala siyachithwa nezindleko. Lezi ndleko zizohlanganisa nokuqokwa kwabammeli ababili. Isicelo seThales sokuchithwa kwamacala siyachithwa nezindleko, lezi ndleko zizohlanganisa nokuqokwa kwabammeli ababili," kusho uMnguni.
Leli cala lithinta ukuthengwa kwezikhali okwadla izigidigidi zamarandi ngo-1990. UZuma ungumsolwa wokuqala kanti ubhekene necala lobudedengu; amabili enkohlakalo, elilodwa lokukhwabanisa imali kanye nangu-12 enkohlakalo ngokuthola imali yesifumbathiso evela kwiThales ithunyelwa kowayengumcebisi wakhe wezezimali, uSchabir Shaik.
IThales ingumsolwa wesibili kanti ibhekene necala lobudedengu; amabili enkohlakalo kanye nelokushushumbisa imali. Kusolakala ukuthi imali eyakhokhelwa uZuma kwakungeyoku"vikelwa kwezepolitiki" kwenkampani uma sekuphenywa ngokushushumbiswa kwezikhali. UShaik watholwa enecala emacaleni amabili enkohlakalo kanye nelilodwa lokukhwabanisa ngo-2005 wagwetshwa iminyaka engu-15 ebhadla ejele. Wadedelwa ngoshwele ngo-2009.
*Udaba oluqhubekayo.