Zibakhalele abasolwa ngobugebengu eSydenham Heights

KUSHAQWE isibhamu nezinhlamvu ngenkathi amaphoyisa ebopha amadoda amathathu asolwa ngokuba yingxenye yodlame phakathi kwamaqembu ezigebengu eSydenham Heights. 

Ithimba lamaphoyisa eProvincial Task Team libophe amadoda amathathu asolwa ngokuba nesandla ekubulaweni kwabantu nokushushumbiswa kwezidakamizwa emaflethini akuRippon Road. 

Amaphoyisa athole izidakamizwa ngesikhathi ebopha abasolwa. Icala libikwe esiteshini samaphoyisa eSydenham.

Omunye wabasolwa ubanjwe eshushumbisa izidakamizwa iheroin ezilinganiselwa emalini engu-R7 580 eBlock A, eSydenham Heights. 

Umsolwa wesibili uboshelwe ukutholakala nesibhamu esingekho emthethweni, ukuphatha izinhlamvu kanye nokubanjwa nezidakamizwa iheroin eBlock B. Umsolwa ubephethe isibhamu iLuger 9mm ebilayishe izinhlamvu ezingu-9. 

Kusolwa ukuthi isibhamu sithathwe komunye umuntu, naye osecaleni lokuhluleka ukuvikela isibhamu nezinhlamvu. Umsolwa waboshwa eKeal Road, eSydenham. Kusolwa ukuthi isibhamu besibolekwe esinye isigebengu esishushumbisa izidakamizwa. 

Abasolwa baboshwe ngemuva kwesigameko lapho kudutshulwe khona ufakazi ecaleni lokubulawa kule ndawo. Ufakazi udutshulwe washonela esekhaya kubo kuBarnes Road, eSydenham ngoMsombuluko. 

Ngokusho kwamaphoyisa, umufi uMnuz Adam Venter udutshulwe ekhanda kathathu. Kubikwa ukuthi umsolwa wayesekhaya elingaqhelile emaflethini ngesikhathi ebona amadoda edubula umuntu. 

Okhulumela amaphoyisa uBrigadier Jay Naicker uthe basaphenya ngezigameko zokubulawa kwabanatu eSydenham, abasola ukuthi kuhlobene nempi yezidakamizwa kule ndawo. 

Phakathi kwamaphoyisa abeyingxenye yokuboshwa kwabasolwa kukhona iNarcotics Crime Intelligence, Durban Metro Drug Team, Durban Metro K9, Shongweni K9 neDurban Public Order Police. 

Idokodo selithunyelwe kwiDirectorate of Priority Crime Investigations (Hawks), oKlebe.