Izindaba

Kumshubele owesilisa obulale inja nekati

Anelisa Kubheka|Published

Isithombe esigciniwe: Independent Media Isithombe esigciniwe: Independent Media

UNQATSHELWE ibheyili owesilisa waseSouth Coast obhekene necala lokuhlukumeza izilwane.  

UMthobisi Mkhanya (22), oboshwe ngesonto eledlule, uzovela eNkantolo yeMantshi eZingolweni namuhla. 

UMkhanya usolwa ngokushaya abulale ikati nomdlwane ngaphambi kokuba aphonse lezi zilwane ethoyilethe. 

UWerner Taljaard, ogada izilwane eSouth Coast SPCA, uthe wahambisa lezi zilwane kudokotela wezilwane ngenkathi eqeda ukuzikhipha ethoyilethi. UTaljaard uthe wathola isikhalazo komunye wabahlali bakulendawo. 

“Omunye wabahlali ungitshele ukuthi kukhona umfana oshaye wabulala ikati nomdlwane. Siphuthumele endaweni yesigameko, safica amaphoyisa njengoba umhlali okhathazekile ubesewatshelile amaphoyisa ngesigameko. Umsolwa ubekwe necala lokusongela lomhlali. Ngibe sengihamba namaphoyisa endaweni yesigameko,” kuchaza uTaljaard.  

UTaljaard uthe umsolwa uboshwe amaphoyisa esendaweni yesigameko. 

“Amaphoyisa angibizile, sangena kulendawo ukuze sizothola ubufakazi. Amaphoyisa angitshele ukuthi umsolwa ulahle izilwane ethoyilethe. Ubengafuni ukukhuluma, angikwazanga ukuthola ulwazi mayelana nokuthi ukwenzeleni lokhu. Ngibe sengiyisa lezi zilwane kudokotela ukuze ziyohlolwa. Kubonakele ukuthi izilwane zishawe zaze zabulawa. Umdlwane ubunezinyanga ezine kuya kwezinhlanu. Izimbambo beziphukile kanye nomlenze wakwesokudla ubuphukile,” kusho uTaljaard.

Ikati kutholakale ukuthi liphelelwe umoya. 

Okhulumela amaPhoyisa KwaZulu-Natal uCaptain Nqobile Gwala uthe umsolwa uthweswe necala lokusongela, njengoba kuthiwa usabise loyo owayefake isikhalazo.