Kulimale abangu-15 kudilika ibhilidi eThekwini

KULIMALE abantu ababalelwa ku-15 ngenkathi kudilika ibhilidi emgwaqeni uWarwick Avenue maphakathi nedolobha iTheku, ngoLwesine emini.

Amalungu omphakathi abegcwele ngaphandle kwe-salon, iButunga Foundation, eyakhele eceleni kwesitolo uKFC. Umsebenzi wakulesi sitolo osinde ngokulambisa kulesi sigameko, ubehleli ngaphandle kwesitolo ebonakala ukuthi usathukile. 

Ngenkathi Isolezwe lifika endaweni yesigameko, umonakalo owenzekile ububonakala njengoba bekudilike uphahla, lawela phezulu kwempahla yokusebenza. 

Umqashi wesitolo uMnuz Bibimba Mufoume odabuka eCongo uchaze ngezingqinamba abahlangabezana nazo kuleli bhilidi. 

“Lana sinenkinga yokuvuza kwamanzi. Uma kunetha imvula, ibhilidi nalo liyanetha. Angazi sizokwenzenjani njengoba selidilikile. Ngiqashile kulendawo, ngikhokha u-R8000 ngenyanga. Senginezinyanga ezine ngiqashe lendawo. Umnini webhilidi uthe uzofika ezolungisa inkinga yokuvuza. Nginesiqinisekiso ukuthi ukudilika kwebhilidi kudalwe ukuvuza kwamanzi. Sekumele ngiyohlangana nomnini webhilidi kanye nomkhandlu wedolobha ukuze sidinge lolu daba,” kusho 

Okhulumela abezimo eziphuthumayo iRescue Care uMnuz Garith Jamieson uthe kutholakale ingane (3) phakathi kwalabo abalimele. UJamieson uthe bonke abalimele bakhishiwe endaweni yesigameko kodwa kusazolethwa inja yamaphoyisa ukuzobheka abanye abalimele. 

UJameson uthe abalimele abayishumi baphuthunyiswe esibhedlela ukuze bathole usizo lwezempilo. Imbangela yokudilika kwebhilidi ayikaziwa.