Uquleke enkantolo owesifazane osolwa ngokubulala indodana
UQULEKE ngaphandle kweNkantolo enkulu eThekwini uMegan Prins osolwa ngokubulala indodana yakhe eMhlanga, obevele enkantolo ngoLwesine. Isithombe: Sne Masuku. UQULEKE ngaphandle kweNkantolo enkulu eThekwini uMegan Prins osolwa ngokubulala indodana yakhe eMhlanga, obevele enkantolo ngoLwesine. Isithombe: Sne Masuku.
UQULEKE enkantolo owesifazane osolwa ngokubulala indodona yakhe endaweni ehlala izivakashi eMhlanga, enyakatho yeTheku.
UMegan Prins (35) ubevele eNkantolo enkulu eThekwini ngoLwesine ngesikhathi equleka ngaphandle kwenkantolo sekusele imizuzu kuqalwe ukuqulwa kwecala abhekene nalo. Ukhulume nommeli wakhe kafushane ephethe isiphuzo sokubuyisa amandla ngaphambi kokuwa phansi.
Amalungu omndeni wakhe amemezile efuna usizo, ngemuva kwemizuzu embalwa azwakala ethi; "oh nkosi, akaphefumuli". Omunye womndeni umemezile ethi "sicela usizo" ngesikhathi izintatheli zifonela abosizo oluphuthumayo. Umsolwa uvule amehlo ephefumulela phezulu ekhihla esikanandi. Abosizo oluphuthumayo bafike emuva kwemizuzu engu-25 bamhlenga ngaphambi kokumfaka kwi-ambulensi bemyisa esibhedlela. Abomndeni babonge izintatheli ngosizo lwazo ngesikhathi belandela abosizo oluphuthumayo beyophuma ngomnyango.
Umsolwa waboshwa esendaweni ehlala izivakashi eMhlanga ngoJuni ngemuva kokubanjwa ngumnikazi wendawo eqeda 'ukubulala' indodana yakhengokuyicindezela ngomqamelo eyincisha umoya.
Ngesikhathi efaka isicelo sebheyili enkantolo kwavela ukuthi wahlala nesidumbu ubusuku bonke ezama ukuzibulala.
Ukuqulwa kwecala bekufanele kuqale ngasekuqaleni kuka-Okthoba kodwa kwahlehliswa ukuze umsolwa afake imiphumela yokuhlolwa kwakhe ingqondo enkantolo. Okunye okuvelile yizinsolo zokuthi uPrins ubekweleta udokotela owayemxilonga ingqondo.