Unina kaSenzo ukhala ngosizi lwezingane
UNINA kaSenzo Meyiwa, uNkk Ntombifuthi Meyiwa (kwesokudla) ukhala ngendodakazi kaSenzo endala engakaze ithole ifa likayise, lapha uthathwe nodadewabo uNkk Thandi Miya noskwiza wakhe uNksz Busi Meyiwa UNINA kaSenzo Meyiwa, uNkk Ntombifuthi Meyiwa (kwesokudla) ukhala ngendodakazi kaSenzo endala engakaze ithole ifa likayise, lapha uthathwe nodadewabo uNkk Thandi Miya noskwiza wakhe uNksz Busi Meyiwa
UYABALISA unina wowayengunozinti we-Orlando Pirates neBafana Bafana, uSenzo Meyiwa ngendodakazi endala kaSenzo engakaze ilithole ifa likayise selokhu abulawa eminyakeni emihlanu edlule.
Ekhuluma neSolezwe ngeSonto uNkk Ntombifuthi Meyiwa (67) wakwaK eMlaza uthe usekhathele wukufela ngaphakathi ngalolu daba.
Uthe ufikelwa yizinyembezi uma ecabanga indlela indodakazi kaSenzo eneminyaka engu-14 eke iswele ngayo izinto yize uyise ayishiyela imali.
“Angisebenzi ngihola impesheni. Ingane kaSenzo yokuqala ihlala la ekhaya. Emuva kokushona kukayise besiyikhulisa ngemali yempesheni sinomkhulu engakashoni,” kusho uNkk Meyiwa.
Uthe umzukulu ufunda uGrade 8 kwesinye sezikole eMlaza.
Uthe njengoba sekusondele uKhisimusi akazi uzoyithengela ngani izimpahla zokugqoka.
“Kungani ingane yakhe kumele ihlupheke kangaka?” kubuza uNkk Meyiwa ehlengezela izinyembezi.
Uthe umyeni wakhe uze washona eyilwa indaba yale mali.
“Angazi noma nami sekumele ngibulawe wukhwantalala yini? Indodana yami uSifiso uke wazama ukuyilwa le ndaba yemali kodwa yehluleka,” kusho uNkk Meyiwa .
Uthe uSenzo washiya izingane ezintathu okuyile ahlala nayo, eyobengunkosikazi wakhe uNksz Mandisa Mkhize neyomculi uKelly Khumalo.
Umfowabo kaSenzo uSifiso uthe uxhumane noSihlalo we-Orlando Pirates, uMnuz Irvin Khoza ngoFebhuwari nonyaka ngalolu daba.
“Wathi angithinte abesikhwama esengamele imali yezingane zikaSenzo, iGuardian Fund. Ngaya ehhovisi eliseThekwini bangikhomba eMgungundlovu, lapho bathi akukho lutho angithinte ihhovisi elisePitoli. Ngathinta ummeli osingethe udaba lwale mali yomshwalense uRaymond Hack wanginikeza inombolo kaTumelo osebenzisa noMaster osingethe lesi sikhwama. UTumelo wangishonisa le nale ngaze ngamyeka,” kusho uMeyiwa.
Uthe nengane kaMandisa ayikaze iyithole imali, wathi akazi ngekaKelly ngoba abaxhumani naye.
Ethintwa owayeyisikhulu esiphezulu seSafa uHack uthe imali yafakwa kwiGuardian Fund ekumele icazelwe izingane zikaSenzo.
“Ngicela bangithinte, bangithumelele umazisi wengane nowalowo ohlala nayo ukuze ngikudlulisele kulesi sikhwama. Kumele balethe ubufakazi bezindleko zengane ukuze budluliselwe kowengamele lesi sikhwama, bakwazi ukuthi bathole usizo,” kusho uHack.