Isitshudeni singqongqise esinye ngomlilo ehlathini

KUBOSHWE isitshudeni saseNyusesi yaKwaZulu-Natal ophikweni lwaseWestville esisolwa ngokubulala singqongqise umngani waso, naye ofunda kule nyuvesi izolo ekuseni.

Isidumbu sikaSamkelo Zondi (24) obenza iBCom kuthiwa sitholwe ngonogada bale nyuvesi sisha ehlathini ngemuva kokubona umsolwa ephuma kuleli hlathi ezintatha zayizolo.

I-video yowesilisa okusolwa ukuthi nguye obulale uSamkelo ifakwe eLadies House kwiFacebook izolo.

Le video ibihambisana nombhalo othi umsolwa ushise umngani wakhe emuva kokuthi isangoma abeye kuso simsole ngokumthakatha.

Lo mlisa uvele etshela amaphoyisa ukuthi uwushisile umkhovu, uwushise ngopharafini.

Uthe nguye kuphela owazi ubunzima adlule kubo, wathi ukulungele ukuyobeka udaba lwakhe enkantolo.

Okhulumela amaphoyisa KwaZulu-Natal uBrigadier Jay Naicker uthe amaphoyisa aseWestville aphenya icala lokubulala.

Uthe isidumbu sowesilisa oneminyaka engu-24 ubudala sitholwe sishisiwe ehlathini eWestville.

Okhulumela iNyuvesi yaKwaZulu-Natal uMnuz Ashton Bodrick uthe basashaqekile ngokubulawa ngesihluku kwesinye sezitshudeni zabo.

“Isidumbu ebesishe kanzima sesitshudeni sethu ebesenza iBCom sitholwe eduze kwenkundla yebhola lombhoxo enyuvesi ophikweni lwaseWestville Campus. Onogada besikhungo babambe umsolwa naye oyisitshudeni sale nyuvesi bamnikela emaphoyiseni.

Kuyavela ukuthi umufi nomsolwa bebazana,” kusho uBodrick.

Uthe inyuvesi iyasigxeka kakhulu lesi senzo, wathi bayazwelana nomndeni nabangani bakamufi.

Uthe izitshudeni kumele zibheke ekuqedeni izifundo zazo ukuze zizolekelela ekuthuthukiseni iNingizimu Afrika.

Unxuse onolwazi ukuba alekelele amaphoyisa ngophenyo.

Imizamo yokuthola ukuphawula komndeni ayizange iphumelele kodwa kuyavela ukuthi uzifikele mathupha endaweni yesigameko.