Lilethelwa umbondo ngabathathu kanyekanye iphoyisa lesithembu
U-SEARGENT Nkululeko Thwala namakhosikazi akhe uNkk Thokozile Thwala, Nksz Balungile Gumede noNksz Nompilo Zuma abazobe bemlethele umbondo ngosuku olulodwa eMpumalanga eHammarsdale Bathathwe nezingane zabo eziyisishiyagalombili U-SEARGENT Nkululeko Thwala namakhosikazi akhe uNkk Thokozile Thwala, Nksz Balungile Gumede noNksz Nompilo Zuma abazobe bemlethele umbondo ngosuku olulodwa eMpumalanga eHammarsdale Bathathwe nezingane zabo eziyisishiyagalombili
LIPHUPHUMA injabulo iphoyisa elizolethelwa umbondo yizithandwa zalo ezintathu ekupheleni kwale nyanga.
USergeant Nkululeko Freedom Thwala (39) waseMpumalanga eHammarsdale osebenzela esiteshini samaphoyisa eNsuze e-Appelsbosch, uthi kuthi akagiye ngenxa yenjabulo.
“Ngilubheke ngabomvu lolu suku. Akusekho ukuhlehlela emuva manje,” usho kanje.
Uthe umbondo uzobe ulethwe uNkk Thokozani MaZondi Thwala (38) ongumhlengikazi, uNksz Balungile Gumede (33) owuthisha noNksz Nompilo Zuma (33) ongumhlengikazi. Uthe le ngqophamlando yosuku ihlelwe yilaba besifazane ngokubambisana, bavumelana ukuthi benze lo mbondo omkhulukazi ngosuku olulodwa.
“Indlela abezwana ngayo yenza bafaniswe nezelamani. Kuyimanje njengoba bematasa nezinhlelo bahamba ngemoto eyodwa,” kusho uThwala.
Echaza ngalesi sithembu sakhe uthe wazwana nabo eminyakeni edlule besakhula.
“Ngaqala ngathandana noMaZondi ngo-1997 sisafunda * -matric saze saqeda isikole silokhu sindawonye sithandana, uthando luvutha amalangabi. Ngo-2003 ngahlangana noMaGumede eMpendle ngahluleka wukuzibamba sagcina sithandana. Kuthe ngo-2007 ngaqala ngathandana noMaZuma nakhona uthando lwavutha amalangabi.”
UThwala uthi ukuthandana nabantu abathathu kugcine sekumbangela ukhwantalala. Uthe lokhu kwakudalwa wukuthi wayesebona ukuthi uma eshadelwa kukhona abazophuka izinhliziyo, ngakho kuhle kulaba besifazane abanike ithuba lokukhetha ukuqhubeka naye noma obonayo ukuthi ngeke ayimele eyesithembu aqhubeke nempilo.
“Angiyena umuntu wamanga noyixoki. Ngabona kukuhle ukuthi bazane futhi ngibanike ithuba lokuzithathela isinqumo ngabakufisayo empilweni ngoba ngase ngizimisele ngokushadelwa. Ngabashayela ucingo ngababizela e-Alexandra Park eMgungundlovu sakuzikhipha nabo.”
Uthi wabachazela ukuthi ubathanda bonke ngokulingana. Wabatshela ukuthi akathandi ukuhlukana nabo kodwa ofisa ukumshiya, ngeke amsole.
“Akekho owangishiya, empeleni banqaba.”
UThwala uthe akayihlelanga indaba yesithembu kodwa wathatha leso sinqumo ngemuva kokuya kumuntu obonayo owamtshela ukuthi usinikwa idlozi, ikakhulukazi uyisemkhulu uMnuz Emmanuel Thwala owayeshade izelamani eziyisishiyagalombili.Yize kuzolethwa umbondo ngoSepthemba 28, ubalobole waqeda bonke laba besifazane. Konke ukwenze ngo-2015. Uveze ukuthi uqale ngoMaZondi.
“Ngangidlulisa isonto ngihambe ngiyocela, ngembese ngilobole kubona bonke ngaze ngaqeda. Ngithe sengiqedile ngashada enkantolo noMaZondi.”
Njengamanje ulungisela ukwenza indumezulu yomshado omhlophe nokungakaqinisekiswa ukuthi uzohlanganiswa noma cha. UThwala namakhosikazi akhe babusiswe ngezingane ezingu-10. Uthe imfihlo yenjabulo ekhaya yiqiniso nokungabi nezimfihlo. UNksz Gumede uhambe emazwini kamyeni wakhe wathi bajabule ngalo mcimbi.
“Sihlale phansi sobathathu njengamakhosikazi savumelana ukwenza umbondo ngosuku olulodwa. Lokhu sikubuke njengento ezodala ubumbano kuphinde kube mnandi. Uthando yinto ekhona nesiphila ngayo kulo mndeni nesifisa ihlezi ikhona kuhambisane nokuthula,” kusho uNksz Gumede.
Uncome ubuqotho bukaThwala nokuba yindoda eneqiniso.
“Uma kukhona esidinga ukukudingida senza i-conference call ngoba asihlali ndawonye. Senza isiqiniseko sokuthi wonke umuntu uveza umuzwa wakhe ukuze kuhlezi kukuhle ekhaya,” ephetha.