Angase aphelelwe umsebenzi unesi osolwa ngokutshontsha umjovo onamandla
LINGASE lisuswe igama lakhe ohlwini lwamanesi abhaliswe ngokusemthethweni unesi osolwa ngokusebenzisa igama lesiguli ukuze athole umjovo onamandla osetshenziswa ukulawula ubuhlungu obunzima kwisiguli.
Kunezinsolo eziveza ukuthi lonesi obesebenza esibhedlela saseShowe, useke wawugila lomkhuba wokutshontsha imijovo nemishanguzo ezibhedlela aseke wasebenza kuzona. Lonesi elisabanjiwe igama lakhe, useke wasebenza ezibhedlela ezinhlanu esifundazweni saKwaZulu-Natal.
UMnyango wezeMpilo usuqinisekise ukuthi uzovula uphenyo ngalolu daba. Okhulumela uMnyango wezeMpilo uNksz Noluthando Mkhize uthe iziphathimandla zesibhedlela bezihlele ukubika lolu daba kwiSA Nursing Council njengoba umsolwa esule emsebenzini ngo-Agasti 22.
“UMnyango ukhathazekile yilezi zinsolo ezinzima ngalendlela. Yize unesi obandakanyeka ekutshontsheni imishanguzo esesulile emsebenzini, iziphathimandla zesibhedlela zizobika lolu daba kwiSA Nursing Council ukuze kuphenywe kabanzi,” kusho uMkhize.
Umthombo osebenza esibhedlela uveze ukuthi iziphathimandla zathola ngodaba lwesiguli esidala okwakumele sinikezwe umjovo iPethadine kodwa lonesi wawugodla ngakuye lomjovo. Kubikwa ukuthi lesi sigameko senzeka ngasekuqaleni konyaka.
“Esikwaziyo ukuthi isiguli sanikezwa iPethadine ngokwemyalelo kadokotela. Kodwa kwathi sekubhekisiswa kahle, sabona ukuthi unesi waqhubeka wathatha lomjovo kwamanye amawadi esebenzisa igama lesiguli. Kuyasolakala ukuthi lomjovo ubewusebenzisa ukuzisiza yena,” kuchaza umthombo.
FUNDA:
Lomthombo uthe akwaziwa ukuthi lonesi useke wayitshontsha yini imijovo ezibhedlela aseke wasebenza kuzo phambilini. “Ulwazi esinalo ukuthi useke wasebenza esibhedlela saseStanger. Useke wasebenza esibhedlela kwaMagwaza eMelmoth, waphinde wasebenza esibhedlela saseNgwelezane Empangeni. Kuvela nokuthi useke wasebenza esibhedlela eChief Albert Luthuli eThekwini nasesibhedlela sakwaNongoma, kodwa akucaci ukuthi kungani ehlezi eshintsha izibhedlela,” kusho umthombo.
Omunye umthombo osesibhedlela uthe incwadi yokwesula yalonesi kwakungamele yamukelwe uma kusaqhubeka uphenyo. “Ukutshontshwa kwemishanguzo nemijovo yicala elikhulu ngoba kulimala iziguli. Uma ingekho imishanguvo, amalunga omphakathi agxeka uhulumeni. Abasebenzi basesibhedlela, ikakhulukazi onesi, bayaphunyuka uma betshontsha imishanguzo. Kugxekwa thina sonke esisebenzayo uma sekushoda imishanguzo,” kusho umthombo.
UNobhala weNational Education, Health and Allied Workers’ Union u-Ayanda Zulu uthe abahambisani nesenzo sabasebenzi basesibhedlela sokutshontsha imishanguzo.
“Sidinga abasebenzi abazobeka izidingo zeziguli phambili kunokuba babheke izinjongo zabo. Sidinga amanesi nabasebenzi besibhedlela abazoqinisekisa ukuthi imishanguzo izofika ezigulini,” kusho uZulu.