Ushone engozini yemoto uGavin Watson weBosasa

USEDLULILE emhlabeni obeyisikhulu esiphezulu senkampani enukwa ngenkohlakalo kuleli, iBosasa, uMnuz Gavin Watson (73).

UWatson udlule emhlabeni engozini echazwe njenge nyantisa igazi eyenzeke eduze kwesikhumulo sezindiza i-OR Tambo International Airport, eGoli, ngoMsombuluko ekuseni.

Ngokombiko wamaphoyisa, kusolakala ukuthi uWatson uhluleke ukulawula imoto yohlobo lweToyota Corolla abehamba ngayo washayisa ukhonkolo webhuluho washonela endaweni yesigameko. 

Isitatimende esikhishwe nguLieutenant Colonel Katlego Mogale sikuqinisekisile ukuthi  kushone owesilisa oneminyaka engu-73 obe sengozini yemoto eduze kwesikhumulo sezindiza i-OR Tambo International Airport.

"Kubikwa ukuthi owesilisa ubeshayela engena esesikhumulweni sezindiza ngesikhathi ehluleka ukulawula imoto abehamba ngayo yabe isishayisa ukhonkolo obambe ibhulohwe lo mgwaqo omkhulu. Abezimo eziphuthumayo baqinisekise ukushona kwakhe endaweni yesigameko kanti sekuvulwe idokodo lokubulala ngokungenhloso ukuze kuphenywe. Igama loshonile lisagodliwe kuze kwaziswe umndeni ngokushona kwakhe," kusho isitatimende.

UWatson ushona nje kusadingidwa udaba lwakhe lokunikela ngo-R500,000 emkhankasweni kaMnuz Cyril Ramaphosa ngesikhathi efuna ukuba umengameli we-ANC ngo-2017. UWatson nezinye izikhulu eziphezulu kule nkampani basolwa ngokugwazela izikhulu nabaholi abakuhulumeni ukuze bathole amathenda. Owayeyisikhulu sezokukhangisa eBosasa uMnuz Angelo Agrizzi wadalula okushaqisayo ngendlela iBosasa ebigwaza ngayo kuhulumeni. 

%%%twitter https://twitter.com/hashtag/sabcnews?src=hash&ref_src=twsrc%5Etfw">#sabcnews pic.twitter.com/tVikeb8Z6J

— Chriselda Lewis ™️ (@Chriseldalewis)