AmaTVET azokwakhelwa izindawo zokuhlala: Nzimande

UNGQONGQOSHE weMfundo ePhakeme, uDkt Blade Nzimande, useveze ukuthi ayisithupha amaTechnical and Vocational Education and Training (TVET) okufanele akhelwe izindawo zokuhlala abafundi kulo nyaka wezimali.

Lokhu kuvezwe nguNzimande ngesikhathi ephendula imibuzo yasePhalamende ebiphonswe nguMnuz Lindinkosi Ngcobo.

UNgcobo ubebuze ngezinhlelo zomnyango zokuhlinzeka abafundi bakuma-TVET ngezindawo zokuhlala eziphephile nokubhekana nomkhuba odlangile wokuhlalisana kwabafundi.

UNzimande uthe ukuhlinzekwa kwezindawo ezisezingeni elifanele kubafundi basemanyuvesi nasemaTVET kubalulekile kuhulumeni.

“Uhlelo lokuhlinzeka ingqalasizinda yezindawo zokuhlala abafundi lusunguliwe ukuze kwenziwe izindawo ezizoba nemibhede engu-300 000 esikhathini esingangeminyaka engu-10. Kule mibhede kukhona nengu-100 000 yabafundi bamaTVET,” kusho uNzimande.

Uveze nokuthi kunohlelo olwenziwa esikhungweni semfundo ephakeme iKing Hintsa College e-Eastern Cape. Uthe amakolishi alandelayo yikolishi iLephalale neNorthlink eLimpopo naseWestern Cape.

“Kusazokhethwa amanye amakolishi ayisithupha ukuze nawo abe yingxenye yalo (uhlelo) kulo nyaka,” kusho uNzimande.

Uthe umnyango wakhe usizana namaTVET ukulungisa izindawo zabafundi ezikhona.

UNzimande uthe noMnyango wokuHlaliswa kwaBantu, nowaManzi neNhlanzeko basebenzisana nawo ukulungisa izindawo zokuhlala zabafundi njengengxenye yohlelo lokuthuthukisa kwezindawo zokuhlala umphakathi.

Uthe imali yemifundaze inyuswe yasuka ku-R2.437 ngo-2017 yafinyelela kuR6.517 billion ngo-2019 ukulungiselela imfundo yamahhala. UNzimande uthe ukunyuka kwemali kwenze ukuthi banike abafundi bakumaTVET isibonelelo esilingene.