Kusabanjwe umoya ngamatekisi eMlaza
BEKUKHALA ibhungane erenki yamatekisi akwaMNR eMlaza ngesonto elidlule ngemuva kokubulawa kwabashayeli ababili ngoLwesibili ntambama. Abashayeli bamatekisi ahamba kulo mzila bathe bazizwa bengaphephile Isithombe: Motshwari Mofokeng/African News Agency (ANA) BEKUKHALA ibhungane erenki yamatekisi akwaMNR eMlaza ngesonto elidlule ngemuva kokubulawa kwabashayeli ababili ngoLwesibili ntambama. Abashayeli bamatekisi ahamba kulo mzila bathe bazizwa bengaphephile Isithombe: Motshwari Mofokeng/African News Agency (ANA)
KUSAME nse ukusebenza kwamatekisi erenki yaseMlaza, iMNR naseNgonyameni njengoba ososeshini bakulezi zindawo bengavumelananga emhlanganweni kulandela ukubulawa kwabashayeli abangaphansi kwasoseshini uMNR eMlaza. NgoLwesibili ntambama kubulawe abashayeli bamatekisi ababili kwizigameko ezehlukene. Umshayeli oyedwa udutshulwe ka-D kanti omunye udutshulwe kwa-M.
Kuthiwa ukubulawa kwalaba bashayeli kulandela ukubangwa kwemizila phakathi kososeshini ababili iMNR Taxi neNgonyameni Taxi. Kuthiwa osomatekisi bakwaMNR banqabele amatekisi aseNgonyameni ukuthi asebenzise umgwaqo odlula eMlaza uma beya eThekwini nokusolwa ukuthi yikho okususe lolu thuthuva.
Izolo ososeshini iMNR Taxi neNgonyameni Taxi babe nomhlangano obulawula yisifunda iNingizumu 2.
UNobhala weNingizimu 2, uMnuz Mandla Malishe, uthe baphume bedangele kulo mhlangano njengoba kungabanga nokuzwana kulabo soseshini.
“UMnyango wezokuThutha usungenelele kulolu daba njengoba uze wasiyalele ngokumele sikwenze ukuze sixazulule lolu daba, kodwa umhlangano awubanga nenqubekela phambili njengoba kugejane amazwi kulabo soseshini,” kusho uMalishe. Isolezwe latshelwa umthombo walo ukuthi usoseshini waseNgonyameni uneminyaka wacela ukuncikiswa owaMNR.
“Ubudlelwana bube muncu ngoba usoseshini waseNgonyameni awuyinyusanga imali yokugibela kule nyanga, uMNR uyinyuse ngo50c kubagibeli abaya ngaphakathi eMlaza, kwabaya eThekwini inyuke ngo R1,” kusho umthombo. Umthombo uthe ukunganyuswa kwemali kwamatekisi aseNgonyameni kuthathwe ngendlela yokudla umsebenzi wakwaMNR kwabe sekukhishwa umyalelo wokuthi bengabe besaguduza emzileni ohamba uMNR, bahambe ngoMangosuthu Highway.
Amatekisi awabonwa erenki yakuMNR emva kokudutshulwa kosomatekisi, kanti abagibeli bagibela amabhasi, abanye bagibela awakwa-E, F nakwa-G. UMnuz Sifiso Shangase, oyimenenja ehhovisi leSantaco KwaZulu-Natal, ucele labo soseshini ukuthi baxoxisane. “Njengoba siyimboni yamatekisi sikhona ukusiza umphakathi, ngakho uma lungaxazululwa lolu daba umphakathi uyahlukumezeka,” kusho uShangase.