Imeya yeTheku iphika ukuba nesandla kolomakadebona

IMEYA yeTheku uNkk Zandile Gumede iyazihlangula ithi ayihlangene nokuqashwa kwabasebenzi, ukwenyuselwa kwabo esigabeni esiphezulu kanjalo nokudilizwa kwabo.

Imeya yeTheku iveze lokhu ngesikhathi ikhuluma naleli phephandaba mayelana nesiteleka sabasebenzi basophikweni lwamanzi kanye nokuhanjiswa kwendle okuthiwa sidalwe ukwenyuselwa ku-grade10 kwabasebenzi abangu-55 balolu phiko abangomakadebona boMkhonto weSizwe.

Izolo abasebenzi abebedinwe begane unwabu baqhubeka nokuvala imigwaqo eminingi engenele kuleli dolobha. Ngenxa yokuvalwa kwemigwaqo kuthiwa amabhasi abethwele abazili ebebeya enkonzweni yesikhumbuzo ebihambisana nomkhuleko ohlelwe yisifundazwe wabangu71 abashone ngesikhathi kunezikhulukhula avalelekile angakwazi ukufika enkundleni yezemidlalo, iCurries Fountain.

UNkk Gumede uthe isimo esiqhubekayo kuleli dolobha siyamkhathaza kakhulu, wathi udaba lokuthi abasebenzi bahudula izinyawo uluzwe kungakabi yisiteleka kodwa ubengeke akwazi ukungenelela kulo ngoba udaba oluthinta undababazabantu, akuyona into ethinta ipolitiki.

“ Ngibikele uNdunankulu ngalo wase eqoka ithimba elizocubungula lolu daba. Ngikugxeka kakhulu ukuvalwa kwemigwaqo, ukuvulwa kwamanzi ezitaladini zaleli dolobha kuze kuvinjwe nabantu ebebeya enkonzweni,” kusho yena.

Uqhube wathi ngesikhathi engena kulesi sikhundla washo ukuthi abantu azokwenza isiqiniseko sokuthi bayanakekelwa omakedebona bezempi, abantu abasha, abesifazane nabakhubazekile.

“Kulokho ngangingaqondile ukuthi kuzokwenziwa ngobudlova, ngangisho ukuthi kuzolandelwa imigomo,” kusho yena.

Lishone elayizolo inyunyana yabasebenzi bamasipala iSouth African Municipal Workers Union (SAMWU) isazobikela abasebenzi bayo mayelana nesiphakamiso somqashi sokuthi lolu daba luyiswe kwiCentral Bargaining Council.

UMnuz Jaycee Ncanana uthe unobhala weSAMWU ezingxoxweni ebebenazo nomqashi kuvele isiphakamiso sokuthi lolu daba ludingidwe kwiBargaining Council.

“Sisazokwethula lokhu kubasebenzi ngaleyo ndlela asazi ukuthi abasebenzi bazobuyela yini emsebenzini kusasa (esho namhlanje),” kusho yena .

Imigwaqo ebivaliwe uPixely KaSeme (West Street), Anton Lembede (Smith Street), Monty Naicker (Pine Street) nokuholelele ekutheni kube nesiminyaminya emgwaqweni.

Laba basebenzi babe sebemashela eCity Hall nokuyilapho behlangane nabebebamele nezikhulu zikamasipala.

Emuva kokulinda ngaphandle kwaseCity Hall abasebenzi abasesitelekeni basichithile isiphakamiso sikamasipala sokuyisa lolu daba esigungwini esengamele ezabasebenzi iCentral Bargaining Council.

Abasebenzi abaku-grade 10 bahola phakathi kukaR18 000 noR20 000 kanti labo abaku-grade 4 bahola uR7 000 kuya kuR8 000.