Izibalo ezishaqisayo ngabafundi abadla izidakamizwa ezikoleni

IZIBALO ezishaqisayo ezikhishwe wuMnyango wezeMfundo eWestern Cape, zikhomba ukuthi kubafundi basemabangeni aphansi abangu-145 abahlolelwe ukusebenzisa izidakamizwa, abangu-84 batholakale benazo emzimbeni.

Emabangeni emfundo ephakeme, kutholakale ukuthi kwabangu-655, abangu- 478 basebenzisa izidakamizwa.

Lezi zibalo zenziwe emveni kwezinsolo zokuthi kunabafundi abasebenzisa izidakamizwa ezikoleni.

Emabangeni aphansi kutholakale ukuthi kulabo abatholakele besebenzisa izidakamizwa, abangu-56 abesilisa.

Ukwenziwa kwalezi zibalo yinto eba minyaka yonke kule ndawo, izikhawu ezahlukene onyakeni.

UNksz Jessica Shelver okhulumela uMnyango wezeMfundo, uthe kubalulekile ukwenza uhlelo olufana nalolu lokuthi abafundi bahlolwe ukuthi basesimeni esifanele yini ukuze nezinga lemfundo lihlale lisesimeni esifanele.

“Kubalulekile ukuthi izikole zethu zingabi ngezikhungethwe yizidakaizwa,” kusho uNksz Shelver.

Uthe abazali yibona okumele babe ngabaqaphi abakhulu ekwazini uhlobo lwezidakamizwa ezisetshenziswa yizingane zabo.

Uthe ngokujwayelekile ukusetshenziswa kwezidakamizwa kwenzeka emakhaya nasemphakathini.

“Kodwa okubuhlungu wukuthi abafundi beza ezikoleni bephethe izidakamizwa futhi bezibhemile,"kusho yena.

Uthe inhloso yalokhu okwenzeka ezikoleni ukuthi bahlole abafundi ukuthi bayazisebenzisa yini izidakamizwa, ukucija othisha ukuthi babe nendlela yokubona kusenesikhathi abafundi abazisebenzisayo.

UNgqongqoshe wezokuThuthukiswa koMphakathi kulesiya sifundazwe, uMnuz Albert Fritz, uthe ucwaningo lwakumuva lukhomba ukuthi abafundi abangu-851 abenza uGrade 12 basengozini yokugaxela ekusebenziseni izidakamizwa impilo yabo yonke.

Lolu cwaningo lwenziwe yiMudita Foundation.

“Ngeke sikuvumele ukuthi abafundi bethu badlale izidakamizwa nokuthi babe yingxenye yamaqembu emigulukudu,” kuchaza yena.