Uboshiwe ‘owalahla’ usana esitamkokweni
ABEZIMO eziphuthumayo namaphoyisa basebenza kanzima behlenga ingane ezelwe ebibhajwe esitamkokweni eNewlands East izolo ABEZIMO eziphuthumayo namaphoyisa basebenza kanzima behlenga ingane ezelwe ebibhajwe esitamkokweni eNewlands East izolo
UKHALELWE ngamasongo kaSigonyela owesifazane osolwa ngokulahla usana esitamkokweni eNewlands East, eThekwini ngeledlule.
Okhulumela amaphoyisa KwaZulu-Natal, uColonel Thembeka Mbele ngoMsombuluko uthe kuboshwe owesifazane oneminyaka engu-27, ngalesigameko esibe sematheni kuleli.
“Kuboshwe owesifazane ozovela enkantolo maduze. Okwamanje usaqaphwe amaphoyisa,” kusho uMbele.
Ngesonto eledlule ngoMsombuluko uMnuz Iyron Lovedale esendleleni eya emsebenzini wezwa sengathi kukhala ikati emgwaqeni uBerracuda Road.
Wazama ukuvula isitamkoko, wabona usana obeluphakathi wabiza abezimo eziphuthumayo namaphoyisa ukuze lutakulwe.
FUNDA: Inhlokomo kuhlengwa usana esitamkokweni
Ukutakula kwathatha cishe amahora amathathu njengoba kwadingeka ukuthi kumbiwe umgodi abazokwazi ukufinyelela ngawo epayipini obekubhajwe kulo usana.
Ngemuva kwalesi sigameko iMeya yeTheku uNkk Zandile Gumede yavakashela usana olwalugcinwe esibhedlela. UNkk Gumede uyale abesifazane abazithwele, abangazifuni izingane ukuthi bangazibulala kodwa banikele ngazo.