Siyeke kanjani ukuhlupheka sidukiswa abasihlolelayo?

Mntanomuntu vuma sivumelane sixakekile. Sikhuluma ngomsamo imihla namalanga sithi wonakele kokunye sizibuza ukuthi sizowelapha kanjani. Kwalapho sitshelwa khona ukuthi wonakele uthola ukuthi nowakhona lapho awulungile.

Asivumelane : Konakele.

Lokhu konakala nokuxakeka kusuka kithina. Inkinga iqala ngesibongo okuzalela ngaso umlando wakho. Uma sibheka umlando wakho unesibongo esonakala ngoba kone thina uqobo phezu komsamo kakadeni owonakele.

Kuthi uyihlo nonyoko bengazange benze kahle nawe ujike ungenzi kahle. Vuma ukuthi awukangizwa ngibhekephi namhlanje. Empeleni ngibheke kuwena nesibongo osekukaningi ngikhuluma ngakho, kodwa namhlanje ngithi konakele uma umama wekhaya ethi ekutholele ekhaya engashadile bese ethi esethola indoda esizomshada, asazi noma sizokuthi ngokwenjabulo, usethatha wonke amasakana akhe ngisho kwawena angakutholanga kwashada naye, emuka nawe useyokubiza ngesibongo salapho eshadele khona.

Usuyokhula uwumlanjwana, ubulanjwana bakho sebulahleke bonke, kusuka ngalelo langa usungumlahlwa ngoba awuzalwa nakuzalwa kuleso sibongo osugxunyekwe kusona.

Ziqale izinkinga usikhulile. Akonakele yini uma umuntu umuzwa ethi emsamo ngibiza isibongo sasekhakho mama kodwa epasini ngibiza esikababa? Uke wayizwa indaba yemisamo emibili kuthiwa ihlalelana ndawonye, engiqonde amathongo phela. Uyaphuma uyosebenza unguDlamini kodwa uma usubuya uyobonga uMkhize?

Nakho izinto zakho azicaci ziyashibilika izinkinga zithe bhe sekuthiwa biza isibongo sikababa wakho engazange akhiphe ngisho isenti leli lodwa, kusho abathi bakulungisela umsamo.

Uthi ulungisa umsamo usho kwayena uyimbudane yokudideka ngokungaqondi nokwazi isintu sithini. Akukhona-ke ukuthi uthi uyaphuma uyolungisa kanti kwalapho uthi uzolungiselwa khona kwakhona ulwazi nesintu nomsamo akwaziwa, yeka ukuqondwa?

Kukodwa lapho sekuthiwa yakha indlu yakomalume emagcekeni akini, ubaba nomama engachanguzanga. Baningi bexakekile kuthiwe bangabiza isibongo sikayise nakuba unina engachanguzanga bese ebaleni elilodwa kuthiwa yakha indlu yakonyokolume kumbe yakubo kayihlo.

Vuma sivumelane sedukile. Nabathi bayasihlolela badukile kwabona. Siyeke kanjani ukuhlupheka? Ubusuku nemini usizi lokukhala ngemali nezingozi, nokuzibulala nokulahlekelwa imisebenzi sigcine sithi siyosindiswa kanti usahamba nayo leyo nkinga ongakayiqaqi, ngoba wonke umuntu udukile.

Ekudukeni kwethu, cishe bekungcono kusengaphambi ko-1994. Kufike uMthethosisekelo omusha sonke esiwujabulela ngohleko olungukitikiti sithi “sawela” kanti yima sigwaliza esizibeni esinzulu. Yilo Mthetho-sisekelo owenze ukuthi ezibhedlela uma uthola ingane ningashadile noyise, kusho abahlengikazi kuqala bathi uphi uyise kufanele ingane ibize uyise. Kusho umhlengikazi omnyama ongumAfrika olazi kahle isiko lesintu sakwantu ukuthi konke lokho akunjalo.

Uhambe usuthi uya eMnyangweni wezaseKhaya uyobhalisa, phela usulungisa iphutha, kuyokuba ngumzukuzuku kuthiwe kufuneka isiqinisekiso sikayise wengane nonina kusayindwe ama-afidavithi.

Anqabe uyise wengane ngokungaqondi ukuthi usembela ingane yakhe ithuna langunaphakade, kumiwe. Makhathaleni ishayeke ingane esikoleni kufiphale nekusasa layo, sande isizwe senhlupheko. Kukhona obaba abahambe bezishaya isifuba bethi ngayihlawula le ngane yenzelwe imbeleko yakithi ithathe isibongo sakithi, liphike isiko lithi ukuhlawula akusho ukuthi ingane sekungeyakho?

Ukungazi nokungaqondi akukho kuyena kuphela kukubazali bakhe uqobo. Namhlanje usuzwa isalukazi esidala sithi bantabami thathani izibongo zoyihlo khona ningayolahleka, uvele ubone ukuthi akulahlekile kwasebancane kulahleke ngisho nakubantu ocabanga ukuthi bangumthombo wayizolo nakuthangi.

Izingane ezizalwa namhlanje zisezinkingeni ezedlula ezayizolo nakuthangi. Bekungconywana izolo ngoba bekuthi noma umntwana etholakala esibhedlela ubephuma nesibongo esiqonde ngqo.

Vuma, sivumelane: umuntu omnyama usazohlupheka kuleli zwe, cishe akukho lapho ayoke abe ngcono khona. Ulahlwe yisiko, isintu noMthethosisekelo wakuleli enguwubona wavuna abamhlophe kunabamnyama. Ngakho muntu omnyama usemgqonyeni njengezibi zangunaphakade, ulahlwe abakini abamnyama.

NANSI INDABA

“Bangilahla, namhlanje sengizilahla mina uqobo”

BHEDLINDABA

033 569 1317/079 747 1911/072 897 2001.