Kuzowashubela amaDelangokubona KwaZulu-Natal
UNGQONGQOSHE wezokuThuthukiswa koMnotho ezokuVakasha neMvelo KwaZulu-Natal, uMnuz Sihle Zikalala, uthi bazothathelwa izinyathelo zomthetho abaphazamisa intuthuko ngoba befuna amathuba ngenkani. Lapha uthathwe ekhombisa ngebhuku lamathuba entuthuko KwaZulu-Natal Isithombe: SITHUNYELWE UNGQONGQOSHE wezokuThuthukiswa koMnotho ezokuVakasha neMvelo KwaZulu-Natal, uMnuz Sihle Zikalala, uthi bazothathelwa izinyathelo zomthetho abaphazamisa intuthuko ngoba befuna amathuba ngenkani. Lapha uthathwe ekhombisa ngebhuku lamathuba entuthuko KwaZulu-Natal Isithombe: SITHUNYELWE
INHLANZI izoshelwa ngamanzi kumaDelangokubona njengoba uNgqongqoshe wezokuThuthukiswa koMnotho, ezokuVakasha neMvelo KwaZulu-Natal, uMnuz Sihle Zikalala, ethe azolala ebaliwe uma eke aqhubeka nomkhuba adume ngawo.
Ekhuluma emcimbini wokwethulwa kwezinhlelo zokuthuthukisa umnotho ezizodla ngaphezu kukaR200 billion obuseHilton Hotel izolo, uZikalala uthe ngeke bazibekezelele izinhlangano ezihlukumeza abatshalizimali nosomabhizinisi ngoba zifuna amathuba ngenkani.
“Sitshele amaphoyisa ukuthi athathe izinyathelo uma kukhona abaphazamisa izinhlelo zentuthuko KwaZulu-Natal. Sifuna ukuheha abatshalizimali bakuleli nabakwamanye amazwe njengoba sithuthukisa umnotho wethu ngakho asinaso isikhathi sezinhlangano ezifuna imali kosomabhizinisi abathuthukisa umnotho wethu. Sihlangana namaphoyisa okungenani kanye ngesonto ngoba bonke abaphazamisa abatshalizimali kufanele balale bebaliwe."
Ubalule ukuthi iKwaZulu-Natal inenqwaba yezinhlelo zentuthuko okubalwa kuzo isigaba sesibili sokuthuthukiswa kweDube Trade Port, ukwakhiwa kwedolobha eNtshonalanga yeTheku okuwuhlelo olwenziwa wuTongaat Hulett, ukwakhiwa kwesizinda esizobhekelela konke okuthinta izimoto eNingizimu yeTheku nokunye okuningi.
UZikalala uthe le ntuthuko izodala amathuba amatoho awu-800 000 ngesikhathi sokwakha bese idala awu-415 000 uma sekuqedwe ukwakha.
IMeya yeTheku uNkk Zandile Gumede nayo ithe ngeke ibabekezelele abaphazamisa izinhlelo zentuthuko ngoba abatshalizimali bakhathazekile ngezinhlangano ezifuna amathuba ebhizinisi ngodli. “Abantu abafunde ukuhlala phansi nezinhlaka ezifanele uma kukhona abanganeme ngakho ngoba uma bephazamisa umsebenzi umthetho uzodlala indawo yawo. Akufanele abantu baphazamise intuthuko ngoba uma kunabatshalizimali abantu bakithi bathola amathuba omsebenzi, bakwazi ukufundisa izingane zabo nomnotho wethu usimame."
UNkk Gumede noZikalala badlulisele ibhuku elinezinhlelo zentuthuko engaphezu kukaR200 billion kuNksz Phumzile Langeni osethimbeni likaMengameli Cyril Ramaphosa lokuheha abatshalizimali.
USihlalo kazwelonke weDelangokubona National Business Forum, uMnuz Thabani Mzulwini uthe ngeke baphawule ngalolu daba ngoba uNgqongqoshe ubekhuluma engqungqutheleni engababizanga bona.
“Thina siba nemihlangano noNgqongqoshe futhi uma efuna ukukhuluma nathi uyasibiza. Kusho ukuthi ubetshela nina njengezintatheli hhayi ukuthi ubekhuluma nathi,” kusho uMzulwini.