Odilikajele kwabathumba iphoyisa balibulala

BAGWETSHWE odilikajele abalisa abathathu abalahlwe ngamacala okubulala ngesihluku amaphoyisa esigamekweni esenzeke ngoSepthemba 2015 emijondolo yaseNamibia, eNanda. IJaji laseNkantolo eNkulu eThekwini uXolile Ntshulana likhiphe lesi sigwebo ngoMgqibelo lathi sizobafundisa isifundo ababulali abangakhombisi ngisho ukuzisola.

ULindokuhle Mchunu (20), uSboniso Khubisa (22) noSabelo Mkhize (28) baphinde bengezelwa eminye iminyaka ngamanye amacala. Bathola iminyaka engu-15 ngokubamba inkunzi behlomile, emihlanu yokuzama ukubulala baphinda bathola eminye engu-15 nezinyanga ezingu-12 ngokutholakala nezibhamu nezinhlamvu okungekho emthethweni.

Kuthiwa benza ubuqili baya esiteshini samaphoyisa bayozenza abacela usizo lokuhambisa incwadi yenkantolo kumuntu thizeni bafika bawajikela amaphoyisa.

USeargent Vusumuzi Moyane noSeargent Ntombikayise Precious Jojisa bephucwa izibhamu bakhunyuliswa nezimpahla zomsebenzi. Bababophela evenini babavalela bahamba bayobabulalela kwenye indawo bazama ukungqongqisa imoto yamaphoyisa ngomlilo. Phakathi kwezibhamu ababezisebenzisa kwakukhona i-AK 47 ne-9mm okuthiwa babebadubula ngazo kwala ngisho becela uxolo baqhubeka babadubula. Kuthiwa uJojisa wasinda ngenxa yokuthi wazenza umuntu oshonile waphuthunyiswa esibhedlela eMhlanga wahlala inyanga. UNkk Lihle Moyane ongunkosikazi wephoyisa elabulawa ubekhona enkantolo uthe nakuba simgculisa isigwebo kodwa ngeke simbuyise umyeni wakhe.

“Lezi zinhlungu ziyohlala zikhona enhlizweni yami. Njalo uma ngibona abasolwa begibela ebhokisini siyabuya isithombe sesihluku abasenza kumnyeni wami,’’ kusho uNkk Moyane.

Ilungu lomndeni womunye wababulali uSipho Mkhize elingafunanga ukudalulwa lithe ibambe ngakho ngokugwetshwa kwakhe ngoba bebefuna ajeze nabo bengumndeni ngoba kuyacaca ukuthi wayengabenza le nto. Kuvele ukuthi lo mlisa uvele unenxanxathela yamacala ake amlahla phambilini.