Kuboshwe 'ubhongoza' wokushushumbiswa kwewunga eThekwini
INDAWO esiphenduke isidleke semilutha yewunga eThekwini eBerea. Isithombe: MOTSHWARI MOFOKENG INDAWO esiphenduke isidleke semilutha yewunga eThekwini eBerea. Isithombe: MOTSHWARI MOFOKENG
AMAPHOYISA kamasipala eThekwini aqinisekise izindaba zokuboshwa kowesilisa wokufika kuleli osolwa ngokuba ngubhongoza ekushushumbiseni iwunga enkabeni yaleli dolobha.
Lo wesilisa okuthiwa ongowokudabuka eKenya uboshwe ngoLwesibili kanti kulindeleke ukuthi avele enkantolo namhlanje. Kubikwa ukuthi uyena obehola ukusatshwalaliswa kwalesi sidakamizwa esiteshini sezitimeza eBerea, ngaphansi komgwaqo uM4, okuyindawo esiphenduke isidleke semilutha yewunga.
Emnyakeni edlule ilokhe iqhubeke njalo impi phakathi phakathi kwamaphoyisa nemilutha yewunga kuleli dolobha, ebizwa ngamaphara.
Okhulumela amaphoyisa omkhandlu, uSuperintendent Parboo Sewpersad, uthe sekunesikhathi amaphoyisa aphenya ngokusatshalaliswa kwezidakamizwa, izibhamu kanye nokubhebhetheka kwamaqembu ezigebengu eqaphe iBerea elandela umkhondo wokuthi iwunga ivela kuphi.
"Uphenyo luholele ekuboshweni kowesilisa waseKenya. Ubanjwe ephethe icocaine, iheroin powder, iheroin ebisipakishwe koplastiki abangu 141, kanye noR240 wemali," kusho uSewpersad.
Umsolwa kulindeleke ukuthi avele enkantolo yeMantshi eThekwini ngoLwesithathu ngamacala okubanjwa nezidakamizwa kanye nokuzidayisa.Izidakamizwa abeziphethe zibiza imali ebalelwa ku R40 000.