Sekushiswe elinye ipulazi eShowe
ISITHOMBE esathathwa ngoMashi ngesikhathi kushiswa amanye amapulazi omoba eShowe ngesikhathi kunombhikisho onodlame ISITHOMBE esathathwa ngoMashi ngesikhathi kushiswa amanye amapulazi omoba eShowe ngesikhathi kunombhikisho onodlame
SESIQALE phansi sashuba isimo eShowe, KwaZulu-Natal, ngemuva kokushiswa kwepulazi lika moba ngesonto ebusuku.
Amalungu omphakathi avuke umbhejazane emgwaqeni uR66, ohlanganisa iShowe neMelmoth, ashaya ngamatshe izimoto okubalwa kuzo nezamaphoyisa. Abebebhikisha kuthiwa baqhube bokhela ngomlilo elinye lamapulazi omoba akulendawo.
Kudingeke ukuthi kuze kubizwe amaphoyisa aseMpangeni aqapha uthuthuva emphakathini kulesi sigameko. Amaphoyisa athe kushiswe ipulazi elilodwa, kwebiwa neveni. Akukaboshwa muntu ngalesi sigameko.
Kwenzeke lokhu nje ngoMashi nonyaka kwashiswa umuzi nepulazi kulandela imibhikisho ecishe ifane abomphakathi besola umnikazi wepulazi ngokufa kwelungu lomphakathi.
Iphoyisa laseShowe elingagunyaziwe ukukhuluma nabezindaba lidalule ukuthi iyaxaka imibhikisho yakamuva.
"Kubukeka engathi bafuna kuvalwe inkampani ethintekayo esigamekweni sokudutshulwa kwelungu lomphakathi (ngoMashi), okuyinto esingeke sikwazi ukuyenza. Siyasola ukuthi lolu thuthuva lakwamuva luhlobene naleso sigameko," kusho leli phoyisa.
NgoMashi lacishe lasha laphela ipulazi likaDkt Fikile Qoboshiyane lishiswa amalungu omphakathi. Kwasha izindawo okuhlala kuzo abasebenzi, izindawo zokusebenza kanye nendlu enkulu yepulazi.
Lokhu kwenzeka kulandela ukubulawa kukaMnuz Sphamandla Xulu (29) owadutshulwa unogada weV1 Security. Kuthiwa uXulu nomunye wesilisa babedoba edamini kuleli pulazi ngokungemthetho, banqaba ukuhamba ngesikhathi bexoshwa onogada.
Lokhu kwaholela ekutheni kube nengxababo wagcina esedutshulwa uXulu. Unogada waboshwa kanti usasesitokisini ngemuva kokwenqatshelwa ibheyili.
Omunye umnikazi wepulazi eShowe ocele ukungadulalwa ngoba esabela impilo yakhe uthe bamatasa bazama ukulungisa lolu daba.