Izindaba

Owe-DA uphakamisa ukuba avalwe umlomo uZuma

Samkelo Mtshali|Published

Owayengumengameli kuleli uMnuz Jacob Zuma. Isithombe: Reuters Owayengumengameli kuleli uMnuz Jacob Zuma. Isithombe: Reuters

UMHOLI weDemocratic Alliance KwaZulu-Natal, uMnuz Zwakele Mncwango, uphakamise ukuthi owayengumengameli wezwe, uMnuz Jacob Zuma angabe esavunyelwa ukukhuluma emicimbini kahulumeni.

UMncwango uthe wenze lesi siphakamiso ngoLwesine olwedlule esiShayamthetho saKwaZulu-Natal. “Ngifuna kube nevoti lokuvimba uZuma ukuba akhulume emicimbini kahulumeni. Usanda kukhuluma emcimbini ohlanganisa amabandla, angaphansi kwekomiti likaMfundisi Vusi Dube. Angazi ukuthi uZuma ubemenywe njengobani ukuba azokhuluma namalungu esiShayamthetho?”

Usole abaholi abathile be-ANC athi baholwa nguDube noMxhumanisi we-ANC KwaZulu-Natal, uMnuz Sihle Zikalala ngokuzama ukuxabanisa uMengameli Cyril Ramaphosa noZuma.

UZikalala uthe uMncwango uzama ukuhlukanisa i-ANC ngokukhuluma ngoqhekeko olungekho.

“Alukho uqhekeko kwi-ANC, siyamazi uMengameli wethu uMnuz Cyril Ramaphosa, asididekile ngalokho,” kusho uZikalala.

UNobhala we-ANC eThekwini, uMnuz Bheki Ntuli uthe uMncwango akagxile kwiDA ayeke ukugxambukela ezindabeni ze-ANC.

“IDA ibilwisa uZuma esengumengameli namanje esephumile esikhundleni isafuna ukukhuluma ngaye. UMncwango akakhulume ngezinto ezizoletha inqubekela phambili ayeke ukugxila kuNxamalala. Angiqondi ukuthi kungani engafuni akhulume emicimbini kahulumeni ngoba uNxamalala usaholelwa wuhulumeni,” kusho

uNtuli.

UMcwango uthe abaholi be-ANC KwaZulu-Natal bazama ngazo zonke izindlela ukuthi uZuma ahlale esezingqondweni zabantu yingakho bemfaka emicimbini kahulumeni.

“Kuyacaca ukuthi bafuna uZuma ahlale esebantwini kodwa lokhu kuhlukanisa abantu ngokobuhlanga. UZuma kufanele abe ngumholi oqotho ayeke ukubukela phansi uRamaphosa,” kusho uMncwango.