UMoyane uchitha izinsolo zokushushumbiswa kwemali
Isikhulu sakwaSars uMnuz Tom Moyane Isikhulu sakwaSars uMnuz Tom Moyane
UKHOMISHANA womnyango oqoqa intela iSouth African Revenue Service (Sars), uMnuz Tom Moyane, uzikhahlele ngezinyawo zombili izinsolo zokuthi abangani bakhe nabanye osomabhizinisi bashushumbisa imali.
Lezi zinsolo ezenziwe yiDA, uMoyane uthe akazi zivelaphi.
IFinancial Intelligence Centre (FIC) okuyisikhungo esibheka ukuhamba kwemali ezweni siveze ukuthi iNew Integrated Credit Solutions (NICS), ikhokhe * -R600 000 kwi-akhawunti yesinye sezikhulu zakwaSars, uMnuz Jonas Makwakwa.
Kuthiwa owayeyiChief Information Officer eMnyangweni wezaseKhaya, ophinde abe ngumngani kaMoyane, uMnuz Patrick Monyeki, ungomunye wabanikazi beNICS ebalwa nezinkampani eziyisishiyagalombili ezithole ithenda lokuqoqa izikweletu zakwaSars kubantu abakweleta intela.
Ngokombiko weDaily Maverick, iFIC yaveza ukuthi kukhona okusolisayo ngemali eyakhokhelwa iMahube Payment Solutions ehlanganiswa noMonyeki weNICS.
Kuvela ukuthi iMahube Payment Solutions yakhokhelwa u-R17 million, okuvela ukuthi u-R600 000 wawo wafakwa kwi-akhawunti kaMakwakwa.
UMoyane utshele amalungu ePhalamende ukuthi akazi lutho ngokuthinteka kukaMonyeki kwiNICS nobudlelwano bakhe nabaqoqa izikweletu.
“Angazi ukuthi uMonyeki uyilungu lebhodi leNICS. Engingakusho wukuthi ngazi uMonyeki njengawo wonke umuntu, ngicabanga ukuthi kubalulekile ukuthi ikomiti lenze umsebenzi walo ukuthola ukuthi unguMqondisi weNICS. INICS isisebenze neSars kusukela ngo-2004 iqoqa izikweletu,” kusho uMoyane.
I-FIC ithe kufanele kuphenywe ukuhamba kwemali engaqondakali kwi-akhawunti kaMakwakwa.
Uphenyo bekufanele luveze ukuthi ngabe le mali itholakale ebugebengwini noma iyashushumbiswa yini.
UMoyane uthe iNICS yafaka isicelo sethenda yokuqoqa imali.
Uthe akakaze abheke ithenda kodwa ibiyenziwa ngabanye abantu.
“Angihlali kwikomiti elibhekelele ukubhidelwa kwamathenda. Ngitshelwa yikomiti ukuthi kunezinkampani ezingakhi. Kulokhu bezingu-68 izinkampani futhi azinikwanga yimina umsebenzi. Angingeni kumathenda,” kusho uMoyane.
UMonyeki uhlale esematheni njengoba kuke kwavela ukuthi wathola ithenda ka-R378 million yasemajele kodwa yaphinde yahoxiswa.