Ugeqa amagula obeboshelwe elomyeni
UNKK Thenjiwe Griffiths uphume ejele emuva kokuhlala iminyaka emibili ngecala lokubulala umyeni wakhe osekuvele ukuthi ubufakazi babuyinzwabethi Isithombe: NONTUTHUKO NGUBANE UNKK Thenjiwe Griffiths uphume ejele emuva kokuhlala iminyaka emibili ngecala lokubulala umyeni wakhe osekuvele ukuthi ubufakazi babuyinzwabethi Isithombe: NONTUTHUKO NGUBANE
OBEGWETSHWE udilikajele ngecala lokubulala umyeni wakhe owayemdala kunaye ugonyuluka ngokuboshelwa amanqina enyathi ngemuva kokuthi ededelwe ejele ngoLwesine ngemuva kokuphumelela kwesicelo sakhe sokuthi kubuyekezwe icala.
UNkk Thenjiwe Griffiths (36) waseTaylors Halts, eMgungundlovu, udedelwe ejele laseWestville abesehlale kulo iminyaka emibili ngemuva kokugwetshwa udilikajele ngoDisemba 10, 2014.
Isidumbu sikaMnuz Allan Griffiths satholwa eColenso ngemuva kokudunwa imoto ehamba noNkk Griffiths othi yena wabaleka abasolwa befuna ukumdlwengula.
Umufi washona ngoJanuwari 2006 beshade ngo-Ephreli 2005.
Izolo uNkk Griffiths engxoxweni ekhethekile neSolezwe uthe selokhu angena ejele ubelwela ukugeza igama lakhe. Uthe bashada eneminyaka engu-25 umyeni wakhe enengu-60.
“Ngangimthanda umyeni wami. Ngaqanjelwa amanga abasemzini ngoba behluleka ukwamukela ukuthi ushade nomuntu omnyama bebona ngimncane ngeminyaka becabanga ukuthi ngizofuna imali yakhe. Ngiyasola ukuthi kwaba nenkohlakalo eyenziwa kuthethwa icala ukuze ngigwetshwe. Ngahlukumezeka ngihlezi ejele iminyaka emibili ekubeni ngazi ukuthi ngimsulwa,” kusho uNkk Griffiths.
Uthe akazi ukuthi likuphi ithuna lomyeni wakhe owangcwatshwa ngabasemzini esaboshiwe kanti lokhu kumphatha kabi njengoba engakwazanga nokumzilela.
Ifa likaGriffiths okuthiwa lingu-R893 000 belingakaze lihlukaniswe ngoba bekunecala.
Esinqumweni senkantolo, iJaji * -Isaac Madondo, libambisene neJaji * -Anton Van Zyl no-Esther Steyn, liveze ukuthi umehluleli kuleli cala wenza iphutha waqula icala ngobufakazi obabuyinzwabethi.
Abukho ubufakazi obabuqanda ikhanda bokuthi waba nesandla kubulawa umyeni wakhe.
Ngesikhathi kuthethwa icala kwavela ukuthi uNkk Griffiths wayengumahosha kamufi bagcina sebeshada. Lokhu ukuphikile wathi kuyamhlambalaza.
“Angikaze ngibe umahosha mina. Ngahlangana nomyeni wami edolobheni wangigibelisa imoto wathatha izinombolo zami. Wayejwayele ukungithumelela ama-airtime. Ngamtshela ukuthi angisebenzi wathi angize eRichards Bay ngizomsebenzela. Ngafika ngahlala kwakhe sagcina sesithandana. Wacela ukuyolobola ekhaya sashada,” kusho uNkk Griffiths.
Uthe umndeni kamyeni wakhe wawuhlezi unomona ngobudlelwane bakhe.
“Ngamfica umyeni wami enamakati amabili nezinja ezimbili ezihlalela yedwa. Ngangiqala nokubona amanye amalungu omndeni wakhe ngesikhathi sengihamba icala enkantolo,” kusho uNkk Griffiths.
Ufisa ukubonga owesilisa owamgibelisa emgwaqweni ngesikhathi bedunwa imoto nomyeni wakhe.
Ubekhokhelwa ngunina nodadewabo imali yabameli bakhe o-Advocate Shane Matthews noNarian Naidoo wakwazi ukudlulisa icala.
Uthe ejele ufunde lukhulu njengoba esenezitifiketi eziningi waphinde wasindiswa.
“Ngifisa ukucula, ngibe uphrojusa womculo. Ngifuna nokulwa nezidakamizwa kubantu abasha ngoba nami bese ngiphuza kakhulu ngibhekene necala,” kusho uNkk Griffiths.